Dorixona qo‘ng‘irog‘i oila buzilishiga sabab bo‘ldi
Xitoyning Yanszyan shahrida yashovchi erkak dorixona tarmog‘ini oilasining buzilishiga sababchi bo‘lganlikda ayblab, sudga murojaat qilish niyatida ekanligini ma’lum qildi. Bu haqida Zamin.uz xabar berdi.
Uning aytishicha, u mahbubasi uchun kontratseptiv dori sotib olishga harakat qilgan, biroq jarayon kutilmaganda oshkor bo‘lib, nikohi xavf ostida qolgan. Erkak to‘lovni mobil ilova orqali amalga oshirgan, ammo texnik nosozlik tufayli operatsiya bajarilmagan.
Shundan so‘ng dorixona xodimlari uning ko‘rsatgan raqami orqali bog‘lanishga harakat qilgan, ammo qo‘ng‘iroqqa uning rafiqasi javob bergan. Ayol shubhalanib, xodimdan qo‘shimcha ma’lumot so‘ragan va shu tariqa sir ochilgan.
Erkak internetda videomurojaat qilib, nafaqat o‘zi, balki “ikkinchi oila”ning ham vayron bo‘lishi mumkinligini ta’kidlagan. U dorixonani javobgarlikka tortishni, dalil sifatida esa xodim va turmush o‘rtog‘i o‘rtasidagi yozishmalar hamda skrinshotlarni taqdim etishni rejalashtirmoqda.
Xenan Zejin advokatlik firmasining vakili Fu Jianning fikricha, erkak moddiy tovon talab qilishi mumkin, ammo buni isbotlash oson emas. Unga ko‘ra, oila buzilishining asosiy sababi erkakning o‘zi va uning xatti-harakatlari hisoblanadi.
Shu bois, birinchi navbatda erkak o‘z qilmishi uchun javob berishi kerak. Agar dorixona xodimlari shaxsiy hayotga haqiqatan aralashgan bo‘lsa, ularning ham qonuniy javobgarligi bo‘lishi mumkin.
Fu Jian qo‘shimcha qilib, agar sudga murojaat qilinsa, dorixona qo‘ng‘irog‘i va nikoh buzilishi o‘rtasidagi sababiy bog‘liqlik aniq dalillar bilan ko‘rsatilishi lozimligini ta’kidladi. Shuningdek, qo‘ng‘iroqning o‘zi qonunga zid emasligi va ma’lumot oshkor etish maqsadida qilinmaganligi sababli shaxsiy huquq buzilganini isbotlash qiyinligini aytdi.
