Turkiya hukumati mamlakat bo‘ylab xavfsizlik infratuzilmasini mustahkamlash maqsadida yangi bombapanohlar qurishni boshladi. Bu haqida Zamin.uz xabar berdi.
Rasmiy Anqaraning ma’lum qilishicha, barcha 81 viloyatda tinch aholini ehtimoliy urush va favqulodda vaziyatlardan himoya qilish uchun maxsus panohgohlar barpo etiladi. Ushbu qaror prezident Rajab Toyyib Erdo‘g‘an tomonidan iyun oyida o‘tkazilgan hukumat yig‘ilishida ma’qullangan.
Loyiha doirasida Turkiya Uy-joy qurilish boshqarmasiga mas’uliyat yuklatilgan. Milliy razvedka akademiyasi tomonidan tayyorlangan hisobotda Isroil va Eron o‘rtasidagi qurolli to‘qnashuvdan olingan saboqlar asosida tezkor ogohlantirish tizimlari hamda zamonaviy jihozlangan panohgohlar qurish tavsiya qilingan.
Hisobotda yirik shaharlardagi metro stansiyalaridan ehtimoliy mojaro sharoitida foydalanish va aholi orasidagi talafotlarni kamaytirish choralari haqida ham takliflar berilgan. Turk rasmiylari Isroilda qurilgan keng qamrovli panohgohlar tarmog‘idan katta taassurot olganini ta’kidlagan.
Ushbu inshootlar havo hujumlari vaqtida minglab odamlarni samarali himoya qilgan. Turkiyaning NTV telekanali ma’lum qilishicha, yangi panohgohlarning asosiy maqsadi harbiy to‘qnashuvlar yoki tabiiy ofatlar, jumladan yadro tahdidlarida aholini xavfsiz saqlashdir.
Hozirgi kunda Turkiyada mavjud panohgohlar soni talabga javob bermaydi. 1987 yilda qabul qilingan nizomga ko‘ra, ko‘plab binolarda panohgohlar bo‘lishi kerak, ammo amalda ular ko‘pincha avtoturargoh yoki ombor sifatida ishlatilgan.
Qurilish ishlarida Yaponiya va Shveysariya kabi mamlakatlarning tajribasi o‘rganilgan. Ba’zi shaharlarda, xususan poytaxt Anqarada panohgohlar qurilishi allaqachon boshlandi.
Mutaxassislar fikricha, ushbu loyiha Turkiyaning xavfsizlik tizimida yangi bosqichni boshlab beradi. Jamiyatda esa bu tashabbus qanday natijalar keltirishini kuzatish qiziqish uyg‘otmoqda.
