AQSh boj imtiyozini bekor qildi, narxlar oshadi
AQSh hukumati arzon import mahsulotlariga berilgan boj imtiyozini bekor qildi. Bu haqida Zamin.uz xabar berdi.
Endilikda 800 dollargacha bo‘lgan buyurtmalar ham bojxona nazoratidan o‘tadi va boj to‘lanadi. Ushbu yangi tartib 29-avgustdan boshlab amaliyotga kiritildi.
O‘tgan yilda AQShga 1,4 milliarddan ortiq posilkalar bojdan ozod qilingan edi. Mutaxassislar fikricha, bu o‘zgarish narxlarning oshishiga va xaridorlar uchun tanlov imkoniyatining kamayishiga olib keladi.
Ayniqsa, kichik biznes sub’ektlari bundan jiddiy zarar ko‘rishi mumkin. Boj imtiyozi asosan Shein va Temu kabi Xitoy internet-do‘konlari tomonidan keng qo‘llanilgan.
Biroq, AQSh hukumati ushbu imtiyozning suiste’mol qilinayotganini, hatto noqonuniy tovarlar olib kirishda foydalanilganini ta’kidlamoqda. Yangi tartib kuchga kirishi bilan bir qator xalqaro pochta xizmatlari AQShga jo‘natmalarni vaqtinchalik to‘xtatib qo‘ydi.
Bu esa xaridorlarda kechikishlar va ayrim mahsulotlarning yetishmasligiga sabab bo‘lmoqda. Mutaxassislarning taxminiga ko‘ra, yaqin kelajakda narxlar oshadi.
Shu bilan birga, Xitoy kompaniyalari AQShdagi omborlari orqali savdoni davom ettirishga harakat qiladi. Ushbu o‘zgarishlar bozorda yangi sharoitlarni yuzaga keltiradi va xarid qilish odatlarini o‘zgartirishi mumkin.
