Turkiya tashqi ishlar vaziri Hoqon Fidan Anqara Isroil bilan barcha iqtisodiy va savdo aloqalarini to‘liq to‘xtatganini ma’lum qildi. Bu haqida Zamin.uz xabar berdi.
Shuningdek, mamlakat havo hududi Isroil samolyotlari uchun yopiq bo‘ladi. Vazirning ta’kidlashicha, turk kemalari bundan buyon Isroil portlariga kira olmaydi.
Parlament yig‘ilishida so‘zlagan Hoqon Fidan Isroilning G‘azo sektori, Livan, Yaman, Suriya va Eronga qarata amalga oshirgan harbiy zarbalari xalqaro hamjamiyatga qarshi terror hujumi ekanini bildirdi. Bu harakatlar mintaqaning xavfsizligiga jiddiy tahdid solmoqda.
2024-yil may oyida Turkiya prezidenti Rajab Toyyib Erdo‘g‘on Isroil bilan savdo munosabatlarini G‘azo urushi sabab to‘xtatganini e’lon qilgandi. Rasmiy ma’lumotlarga ko‘ra, 2023-yilda ikki mamlakat o‘rtasidagi tovar ayirboshlash hajmi 6,8 milliard dollarni tashkil etdi va uning 75 foizi Turkiya eksportiga to‘g‘ri kelgan.
Isroil matbuotida oxirgi paytlarda turk portlari Isroilga aloqasi yo‘qligini va harbiy yoki xavfli yuklarni qabul qilmasligini tasdiqlovchi sertifikat talab qilinayotgani haqida xabarlar berildi. Shuningdek, 2023-yilning 13-noyabrida Erdo‘g‘on Turkiyaning Isroil bilan diplomatik munosabatlarini rasman to‘xtatganini e’lon qilgan edi.
Anqaraning ushbu qat’iy qarori ikki davlat o‘rtasidagi munosabatlarni yangi bosqichga olib chiqdi va mintaqaning geosiyosiy holatida katta o‘zgarishlarga sabab bo‘lmoqda.
