Janubiy Koreyada sun’iy intellektli qo‘g‘irchoqlar tarqatildi
Janubiy Koreyada keksalar va demensiya bilan og‘rigan bemorlar uchun sun’iy intellektga ega qo‘g‘irchoqlar tarqatila boshlandi. Bu haqida Zamin.uz xabar berdi.
Ushbu innovatsion texnologiya yolg‘izlikka qarshi kurashishda muhim vosita sifatida foydalanilmoqda. ChatGPT asosida ishlab chiqilgan Hyodol nomli qo‘g‘irchoq mamlakat bo‘ylab 12 mingdan ortiq nafaqaxo‘r tomonidan kundalik hayotda qo‘llanilmoqda.
Bu qurilma nafaqaxo‘rlarning hayotiga interaktiv muloqot imkonini yaratadi. Qo‘g‘irchoqlar har kuni nafaqaxo‘rlarga kayfiyat va jismoniy holatini so‘rab, ularning holatini kuzatib boradi.
Maxsus sensorlar harakatni qayd etib, agar bir sutka davomida harakat sezilmasa, tezkor xizmatlarga va yaqin qarindoshlarga avtomatik ravishda xabar yuboradi. Shuningdek, sistema insonning ruhiy holatidagi tushkunlik belgilarini aniqlab, oldindan ogohlantiradi.
Asosiy maqsad inson bilan doimiy muloqot o‘rnatish va psixologik qo‘llab-quvvatlashdir. Mustaqil tadqiqotlar natijasida Hyodol bilan suhbatlar depressiya va demensiya simptomlarini kamaytirishda samarali ekani aniqlangan.
Ijtimoiy xodimlar ta’kidicha, keksalar uchun gaplashish imkoniyati juda muhim bo‘lib, ba’zan ular o‘z his-tuyg‘ularini farzandlariga ham aytmaydi. Biroq yangi texnologiya bilan bog‘liq ba’zi qiyinchiliklar ham mavjud.
Ko‘p nafaqaxo‘rlar qo‘g‘irchoqlarni shaxsiy do‘st sifatida qabul qilib, ularga kiyim kiyishtirish, ovqat tayyorlash va hatto buzilganda tashvishlanish kabi odatlarni shakllantirgan. Ishlab chiqaruvchi kompaniya bosh direktori ma’lum qilishicha, ayrim nafaqaxo‘rlar qo‘g‘irchoqlarini o‘zlari bilan birga dafn etishni ham so‘ragan.
Demensiya bilan og‘rigan keksalar qo‘g‘irchoqning gaplarini to‘g‘ridan-to‘g‘ri qabul qiladi. Shu sababli ishlab chiquvchilar chat-botda ba’zi provokatsion iboralarni cheklashga majbur bo‘lgan.
Tahlilchilar fikricha, 2030 yilda qariyalarga g‘amxo‘rlik qiluvchi sun’iy intellektli robotlar bozori 7,7 milliard AQSH dollariga yetishi kutilmoqda. Hyodol qo‘g‘irchoqlari nafaqat yolg‘izlikni kamaytirish, balki keksalarning kundalik hayotini tartibga solish va oila a’zolariga qo‘shimcha ma’lumot yetkazishda ham muhim ahamiyatga ega.
Bu zamonaviy texnologiyalar va sun’iy intellektning inson hayotidagi samarali qo‘llanilishiga yorqin misoldir.
