AQSH Davlat departamenti BMT Bosh assambleyasi doirasida ishtirok etishi kutilgan Falastin delegatsiyasi a’zolarining vizalarini bekor qildi. Bu haqida Zamin.uz xabar berdi.
Ushbu qaror natijasida Falastin rahbari Mahmud Abbos va unga hamroh bo‘lishi rejalashtirilgan 80 ga yaqin rasmiy sentyabr oyida Nyu-York shahrida bo‘lib o‘tadigan xalqaro yig‘ilishda qatnashish imkonidan mahrum bo‘ldi. Davlat kotibi Marko Rubio Falastin tomonini tinchlik jarayonini izdan chiqarish va Falastin davlatini bir tomonlama tan olishga urinishda aybladi.
Shu bilan birga, Davlat departamenti vizalarni bekor qilishni terrorchilikni rag‘batlantirmaslik siyosati bilan izohladi. Falastin tomoni esa AQSHning bu qadamini 1947 yilda qabul qilingan BMT shtab-kvartirasi to‘g‘risidagi xalqaro kelishuvga zid deb baholadi.
Falastin tashqi ishlar vaziri maslahatchisi Ahmad al-Dik BMT bosh kotibi Antoniu Guterrish va a’zo davlatlarni bu masalaga jiddiy e’tibor qaratishga chaqirdi. Jahon ommaviy axborot vositalari ma’lumotlariga ko‘ra, AQSH BMT bosh qarorgohi joylashgan davlat sifatida har bir mamlakat vakillari uchun to‘siqsiz kirish imkoniyatini yaratishi shart.
Shu sababli Vashingtonning Falastinga qarshi bu qarori ko‘plab davlatlar tomonidan tanqid qilinmoqda. BMT Bosh assambleyasining sentyabr oyidagi yig‘ilishida Fransiya, Buyuk Britaniya, Kanada va Avstraliya Falastin davlatini rasman tan olishi mumkin.
Bu holat AQSHning bahsli qarorini Falastinni davlat sifatida tan olish jarayoniga qarshi qadam sifatida ko‘rishga asos bo‘lmoqda. Prezident Donald Tramp ma’muriyati esa bu bilan chegaralanmay, G‘azo sektoridagi yarador bolalarni qabul qilish dasturini ham to‘xtatdi.
Eslatib o‘tamiz, AQSH 2023 yil 7 oktyabrdan buyon G‘azo sektorida davom etayotgan va yuz minglab falastinlik qurbon bo‘lgan urushda Isroilni hech qanday shartsiz moliyaviy, harbiy va diplomatik jihatdan qo‘llab-quvvatlab kelmoqda. Shuningdek, Vashington Falastin davlatining tuzilishiga qat’iyan qarshi turibdi.
O‘tgan yil 18 aprel kuni BMT Xavfsizlik Kengashida Falastinning to‘liq a’zoligini ko‘zda tutuvchi rezolyutsiya aynan AQSH tomonidan veto qilindi va yo‘qqa chiqdi. Keyinchalik BMT Bosh assambleyasining navbatdan tashqari yig‘ilishida ham AQSH Falastinning xalqaro tashkilotlarga to‘liq qo‘shilishiga qarshi ovoz berdi.
