Rossiya Ukrainaga qarshi harbiy harakatlarni to‘xtatish niyatida emas. Bu haqida Zamin.uz xabar berdi.
Bu haqda Rossiya Bosh shtabi rahbari Valeriy Gerasimov rasmiy bayonot berdi. Uning so‘zlariga ko‘ra, qo‘shinlar maxsus harbiy operatsiya doirasidagi vazifalarni hujum amaliyotlari bilan bajarishda davom etadi.
Shuningdek, kuz mavsumi uchun yangi maqsadlar belgilanishi ta’kidlandi. Gerasimovning nutqi aks etgan videoni Rossiya Mudofaa vazirligi e’lon qildi.
Unda 2025 yil bahor-yoz kampaniyasi natijalari tahlil qilindi va keyingi bosqich vazifalari belgilandi. U strategik tashabbus to‘liq Rossiya Qurolli Kuchlarida ekanligini qayd etdi.
Hozirda Rossiya armiyasi Lugansk viloyatining taxminan 99,7 foizini, Donetskning 79 foizini, Zaporojening 74 foizini va Xerson viloyatining 76 foizini nazorat qilmoqda. Shu bilan birga, Gerasimov 28 va 30 avgust kunlari Ukrainaga qaratilgan ommaviy zarbalar harbiy-sanoat kompleksiga oid obyektlarga qaratilganini bildirdi.
Biroq ommaviy axborot vositalari xabarlariga ko‘ra, zarbalardan so‘ng Kiyev shahrida ko‘p qavatli uyning podezdi vayron bo‘lib, 25 kishi, jumladan to‘rt nafar bola halok bo‘lgan. Boshqa hududlarda esa fuqarolik infratuzilmasiga katta zarar yetkazilgan.
Umuman olganda, Rossiya armiyasi Ukraina hududining taxminan 20 foizini nazorat qilmoqda. Ammo bu hududlarning ko‘pchiligi urushning dastlabki haftalarida egallangan.
Deep State ma’lumotlariga ko‘ra, oxirgi 1010 kun davomida Rossiya atigi 5842 kvadrat kilometr maydonni o‘z nazoratiga olgan, bu esa mamlakat hududining atigi 0,97 foizini tashkil etadi. The Economist tahlilchilari fikricha, 2025 yil yoziga kelib Rossiya armiyasi har 0,038 kvadrat kilometr hudud uchun bitta harbiy xodimini yo‘qotgan.
Ularning hisoblashicha, shu sur’atda Donetsk, Lugansk, Zaporojye va Xerson viloyatlarining ma’muriy chegaralariga faqat 2029 yil fevral oyida chiqish mumkin bo‘ladi. Ukraina hududini to‘liq egallash uchun esa yana taxminan 89 yil davomida kurash olib borish talab etiladi.
