Avstraliyada ikki politsiyachi o‘ldirildi, gumonli qochmoqda

Avstraliyaning Viktoriya shtatida ikki politsiyachini o‘ldirganlikda gumon qilingan 56 yoshli Dezzi Friman hali ham qo‘lga olinmagan. Bu haqida Zamin.uz xabar berdi.

U o‘tgan hafta Porepunkah qishlog‘idagi uyida tintuv vaqtida politsiyachilarga qarshilik ko‘rsatib, ularni otib tashlagan. Voqeadan so‘ng Friman o‘rmonlarga qochib ketgan.

Politsiya uni topish uchun vertolyotlar, zirhli mashinalar va maxsus kuchlarni jalb qilgan holda katta qidiruv ishlarini olib bormoqda. Hokimiyat ma’lumotlariga ko‘ra, gumonlanuvchiga ayrim shaxslar yordam berayotgani aniqlangan.

Politsiya ularni ogohlantirib, bunday harakatlar og‘ir jinoyat hisoblanishini eslatgan. Frimanning rafiqasi Amaliya Friman erini taslim bo‘lishga chaqirdi va halok bo‘lgan politsiyachilar oilalariga hamdardlik bildirdi.

U oilasining hokimiyatga qarshi munosabati yo‘qligini ham ta’kidladi. Mazkur voqea Avstraliyada so‘nggi yillarda hokimiyatga qarshi guruhlar faoliyati kuchaygani haqida yangi savollarni yuzaga keltirdi.

Uch yil oldin Kvinslend shtatida sodir bo‘lgan shunga o‘xshash hujumda ham politsiyachilar halok bo‘lgan edi. Ushbu hodisalar mamlakatda xavfsizlik va tartibni ta’minlash masalalarining dolzarbligini yana bir bor ko‘rsatmoqda.

Politsiya va hukumat organlari jinoyatchilarni tezroq aniqlash va jazolash uchun choralar ko‘rishni davom ettirmoqda.