Amerika Qo‘shma Shtatlari ma’muriyati Falastin fuqarolari, ayniqsa G‘azo sektori va G‘arbiy Sohilda yashovchilar uchun vizalar berishni bosqichma-bosqich to‘xtatmoqda. Bu haqida Zamin.uz xabar berdi.
Bu haqda “New York Times” nashri rasmiy manbalarga tayanib xabar berdi. Ma’lumotlarga ko‘ra, 16 avgust kuni AQSH Davlat departamenti G‘azo aholisi uchun barcha turdagi tashrif vizalarini bekor qilganini e’lon qildi.
Oradan ikki kun o‘tib, ya’ni 18 avgustda yanada qat’iy qaror qabul qilindi. Shu kuni Vashington barcha AQSH elchixonalariga maxsus ko‘rsatma yuborib, G‘arbiy Sohil va xorijdagi Falastin diasporasidan bo‘lgan shaxslarga immigratsiyaga oid bo‘lmagan vizalarni berishni to‘xtatishni buyurdi.
Ushbu cheklov tahsil olish, davolanish, xizmat safari va oilaviy tashrif kabi yo‘nalishlarda vizalar olish imkoniyatiga ham ta’sir qilmoqda. 29 avgust kuni AQSH Davlat departamenti yana bir bayonot bilan chiqdi.
Unda sentabr oyida Nyu-Yorkda bo‘lib o‘tadigan BMT Bosh Assambleyasining 80-sessiyasida qatnashish uchun vizalar so‘rab murojaat qilgan Falastin rasmiylarining arizalari rad etilgani ma’lum qilindi. Bayonotda aytilishicha, AQSH qonunchiligiga muvofiq, Davlat kotibi nomidan senator Marko Rubio tomonidan Falastin Ozodlik Tashkiloti va Falastin ma’muriyati vakillariga beriladigan vizalar bekor qilingan yoki rad etilgan.
Vashingtonning bu qat’iy qarori Falastin tomonida keskin norozilik uyg‘otdi. Rasmiy Ramalla buni siyosiy bosim va Falastinning xalqaro maydondagi ovozini cheklash urinishlari sifatida baholamoqda.
