Qirg‘iz-O‘zbek chegarasida otishma, ikki halok
Qirg‘iziston va O‘zbekiston chegarasida yuz bergan otishma natijasida ikki qirg‘izistonlik halok bo‘ldi. Bu haqida Zamin.uz xabar berdi.
Qirg‘iziston Milliy xavfsizlik davlat qo‘mitasi Chegara xizmati ma’lumotlariga ko‘ra, O‘zbekiston chegarachilari talabga bo‘ysunmagan ikki kishiga qarshi qurol qo‘llashga majbur bo‘lgan. Ma’lumotlarga ko‘ra, 25 avgust kuni Chotqol tumani Ayg‘ir-Jal qishlog‘ida ikki fuqaro bedarak yo‘qolgani haqida xabar kelib tushgan.
Qidiruv ishlari davomida, 28 avgust kuni o‘tkazilgan uchrashuvda O‘zbekiston chegarachilari 15 avgustda o‘z hududlarida noma’lum ikki shaxs aniqlanganini bildirgan. Rasmiy xabarda aytilishicha, ushbu shaxslar chegarachilarning to‘xtash haqidagi talabiga bo‘ysunmagan.
Natijada chegarachilar qurol ishlatishga majbur bo‘lgan va ikki fuqaro o‘qdan olgan jarohatlari sabab halok bo‘lgan. 31 avgustda bedarak yo‘qolganlarning qarindoshlari O‘zbekistonga borib, marhumlarni tanib olgan.
1 sentyabr kuni “Baymak” nazorat-o‘tkazish punkti orqali jasadlar Qirg‘iziston tomoniga topshirilib, Kerben shahridagi morgga ekspertiza uchun yuborilgan. Shuningdek, Qirg‘iziston va O‘zbekiston chegaralarining rahbarlari 2 sentyabrdan boshlab joyida qo‘shma tekshiruv o‘tkazishga kelishib olgan.
O‘zbekiston tomoni halok bo‘lganlarning mulki — uchta ot va chodirni Qirg‘izistonga qaytarishga tayyorligini bildirgan. Mutasaddilar bu voqea chegarada xavfsizlikni mustahkamlash va kelajakda shunday noxush holatlarning oldini olish zarurligini yana bir bor ko‘rsatganini ta’kidladi.
