Qozog‘iston Prezidenti Qosim-Jo‘mart To‘qayev SHHT plus sammitida Birlashgan Millatlar Tashkilotining kelajagi va uning islohoti haqida so‘zladi. Bu haqida Zamin.uz xabar berdi.
U bugungi murakkab geosiyosiy sharoitda BMT universal va mustaqil institut sifatida qo‘llab-quvvatlanishi zarurligini ta’kidladi. Prezidentning fikricha, ayniqsa BMTning asosiy tuzilmasi hisoblangan Xavfsizlik Kengashini yangilash masalasi kun tartibidan tushmasligi kerak.
To‘qayev bu jarayon murakkab bo‘lsa-da, boshqa yo‘l yo‘qligini aytdi. U hozirgi avlod yetakchilari bu mas’uliyatdan voz kechsa, butun dunyo davlatlarining BMTga ishonchi zaiflashishini ta’kidladi.
Shuningdek, Qozog‘iston rahbari Xitoy tomonidan ilgari surilgan Global Governance Initiative — global boshqaruv tashabbusini yuqori baholadi. Uning so‘zlariga ko‘ra, mazkur tashabbus xalqaro hamjamiyatning uzoq muddatli taraqqiyot rejalarini o‘z ichiga olib, adolatli va barqaror dunyo tartibini yaratishda umumiy harakatlarni kuchaytiradi.
To‘qayevning bayonoti global muammolarni hal qilishda xalqaro hamkorlik va islohotlarning muhimligini yana bir bor ko‘rsatdi.
