Fransiyada davlat idoralari uchun Tchap majburiy bo‘ldi
Joriy yilning 1-sentyabridan boshlab Fransiya hukumati barcha vazirliklari va davlat idoralari uchun xavfsiz va tezkor xabar almashish xizmati Tchapdan muntazam foydalanish majburiy bo‘ldi. Bu haqida Zamin.uz xabar berdi.
Ushbu qaror davlat xavfsizligi va suverenitetini himoya qilish maqsadida qabul qilindi. Tchap nomi XVIII asrda optik aloqa usullarini ixtiro qilgan mashhur fransuz muhandisi Klod Shappaga hurmat sifatida berilgan.
Endilikda Fransiyadagi barcha davlat xizmatchilari, jumladan vazirlik xodimlari, professional yozishmalar va rasmiy aloqa uchun faqat Tchap platformasidan foydalanishi shart qilindi. Shu bilan birga, WhatsApp, Signal va Telegram kabi ommaga mo‘ljallangan messenjerlar rasmiy xizmatlar ro‘yxatidan chiqarildi.
Bu qaror davlat aloqa tizimining xavfsizligi va maxfiyligini ta’minlashga qaratilgan. Bosh vazir Fransua Bayru yozgan rasmiy xabarda aytilishicha, ommaviy lahzali xabar almashish ilovalari kundalik muloqotda muhim bo‘lsa-da, ular xavfsizlik nuqsonlaridan xoli emas.
Shu sababli barcha davlat xizmatchilaridan Idoralararo raqamli boshqarma tomonidan ishlab chiqilgan Tchap ilovasini o‘z qurilmalariga o‘rnatish va muntazam foydalanish talab qilinmoqda. Bu qadam davlat aloqalarini zamonaviy va xavfsiz texnologiyalar yordamida olib borishni ta’minlashga xizmat qiladi.
