Angliyada 16 yoshgacha energetik ichimlik taqiqlandi

Angliyada 16 yoshdan kichik yoshdagi bolalarga Red Bull, Monster va Prime kabi mashhur energetik ichimliklarni do‘konlar, restoranlar, kafelar, savdo avtomatlari hamda internet orqali sotish taqiqlanishi mumkin. Bu haqida Zamin.uz xabar berdi.

Hukumat bu borada yangi qonun loyihasini ishlab chiqmoqda. Ushbu chora yoshlarning sog‘ligini himoya qilish maqsadida qabul qilinmoqda.

Ma’lumotlarga ko‘ra, Buyuk Britaniyada uchdan bir qism bolalar har hafta kamida bir marta energetik ichimliklarni iste’mol qiladi. Bu yoshlar orasida kofein iste’molining oshishiga sabab bo‘lmoqda.

Ko‘pgina supermarketlar esa allaqachon ixtiyoriy ravishda 16 yoshdan kichiklarga bunday ichimliklarni sotmaslik tartibini joriy qilgan. Energetik ichimliklarda kofein miqdori ba’zida ikki stakan qahvadan ham yuqori bo‘lishi mumkin.

Ortiqcha iste’mol bosh og‘rig‘i, uyqusizlik, yurak urishining tezlashishi va ritm buzilishiga olib kelishi mumkin. Sog‘liqni saqlash va ijtimoiy ta’minot vaziri Uyes Stritingning ta’kidlashicha, yoshlarga energetik ichimliklarning salbiy ta’siri yaqqol ko‘rinib turibdi, shuning uchun zarur chora-tadbirlar ko‘rilmoqda.

Qonun loyihasini muhokama qilish jarayoni 12 hafta davom etadi. Shu davrda sog‘liq va ta’lim sohalaridan mutaxassislar, jamoatchilik vakillari, chakana savdo tarmoqlari hamda ishlab chiqaruvchilar fikrlari yig‘iladi.

Taqiqning amaliyotga joriy qilinishi parlament vakolat muddati tugashidan ancha avval amalga oshirilishi kutilmoqda.