Xitoyda smartfondan uzoq foydalanish falajga olib keldi

Xitoyda 19 yoshli talaba uzoq vaqt davomida smartfondan foydalanishi sababli falaj bo‘lib qoldi. Bu haqida Zamin.uz xabar berdi.

Syao Dun ismli yigit doimiy ravishda boshini egib, telefonga qarab o‘tirgan va ish vaqtida ham qurilmadan uzilmagan. U Futszyan viloyatidagi restoranda ishlagan va tanaffuslarda ham telefonidan ko‘z uzmagan.

Mutaxassislar bunday holatni texnologiyaga bog‘liq hayot tarzining salbiy oqibatlari deb baholamoqda. Uzoq vaqt boshni pastga egib turish qon aylanish tizimiga zarar yetkazishi va asab hamda qon tomirlarida muammolar paydo qilishi mumkin.

Tekshiruvlar natijasida talabaning bo‘yin qismida zo‘riqish yuzaga kelgani aniqlangan. Bu esa qon tomirlarida tromb hosil bo‘lishiga olib kelgan va miyaga qon oqimini cheklagan.

Natijada Syao Dun harakatlanish qobiliyatini yo‘qotib, bir kuni uyg‘onganda butunlay falaj bo‘lib qolgan. Shifokorlar uning holatini og‘ir deb baholamoqda.

Hozirda u shifoxonada davolanmoqda, maxsus terapiya va fiziologik mashqlar yordamida sog‘ligi tiklanmoqda. Shifokorlar bunday holatlardan saboq olish lozimligini ta’kidlamoqda.

Smartfondan uzoq vaqt foydalanishda ehtiyotkorlik zarurligi haqida ogohlantirish berilmoqda.