Judi Garlendning qizil tuflilari rekord narxda sotildi

Gollivud klassikasi hisoblangan “Oz sehrgari” filmida Judi Garlend kiygan mashhur qizil tuflilar Heritage Auctions auksionida 32,5 million dollarga sotildi. Bu haqida Zamin.uz xabar berdi.

Dastlabki boshlang‘ich narx 1,55 million dollar bo‘lgan bo‘lsa, taxminlar 3 million atrofida edi. Biroq yakuniy narx barchani hayratda qoldirdi va bu qiymat “Yoqut tuflilar” uchun yangi tarixiy rekordga aylandi.

Filmda bir nechta juft tuflilar ishlatilgan bo‘lib, hozirda ularning faqat to‘rttasi saqlanib qolgan. Ularning biri 2000 yilda 666 ming dollarga sotilgan, boshqasi esa 2012 yilda Stiven Spilberg va Leonardo Di Kaprio tomonidan xarid qilinib, Los-Anjelesdagi Kino akademiyasi muzeyiga sovg‘a qilingan.

Sotilgan juft tuflilar eng yuqori sifatli namunalar hisoblanadi va aynan filmda Dorotining oyoqlari yaqin ko‘rsatilgan sahnalarda ishlatilgan. Tuflilar ilgari kollektor Maykl Shouga tegishli bo‘lgan.

Ular 2005 yilda muzeyga qo‘yilganidan so‘ng o‘g‘irlangan, ammo FQB ularni 2018 yilda topib, egasiga qaytarib bergan. Ma’lum bo‘lishicha, o‘g‘rilik ortida Terri Jon Martin turgan va u tuflilar haqiqiy yoqutdan yasalgan deb hisoblagan.

Filmda esa aynan shu tuflilar Dorotining uyga qaytish kaliti bo‘lgan. Qahramon uch marta tuflining tagini urib, “Uydek joy yo‘q” degan so‘zlarni takrorlashi kerak edi.

Bu sahnalar film tarixida juda mashhur bo‘lib, tuflilar madaniy meros sifatida katta ahamiyatga ega.