Janubiy Amerikada ulkan yalqovlar tunnellari topildi
XXI asr boshlarida Janubiy Amerikada joylashgan yer ostidagi sirli tunnellar olimlar e’tiborini tortdi. Bu haqida Zamin.uz xabar berdi.
Ushbu tunnellar inson faoliyati yoki tabiiy geologik jarayonlar natijasi emasligi aniqlanib, katta qiziqish uyg‘otdi. Braziliyada faoliyat yuritayotgan geologiya professori Geynrix Frank qurilish maydonchasi yaqinida notanish teshikni topdi va uni o‘rganishga qaror qildi.
U tunnel ichiga kirib, taxminan 4,5 metr uzunlikdagi yo‘lakni kuzatdi. Tunnel devorlari va shiftida katta tirnoq izlari mavjud edi.
Professorning fikriga ko‘ra, bunday shakldagi va tirnoq izlariga ega uzun tunnelni hech qanday geologik jarayon hosil qilmaydi. Ular faqat kuchli va katta hayvonlar tomonidan qazilishi mumkin.
Tadqiqotlar shuni ko‘rsatdiki, bu tunnellarni qazigan mavjudotlar minglab yillar oldin yashab o‘tgan ulkan yalqov hayvonlar bo‘lgan. Ular zamonaviy yalqovlarga nisbatan katta va kuchli bo‘lib, Afrika fillariga teng bo‘lgan.
Braziliyaning Rio Grande-du-Sul mintaqasida professor Frank va uning hamkasblari 1500 dan ortiq shunday yer osti yo‘laklarini aniqladi. Eng uzun tunnel taxminan 600 metrga cho‘zilgan va inson o‘tishi uchun yetarli kenglikka ega edi.
Ushbu tunnellar ehtimol, bir necha avlod yalqovlar tomonidan qazilgan deb hisoblanadi. 2018-yilda AQShning Yuta shtatida o‘tkazilgan tadqiqotda esa odamlar va yalqovlar o‘rtasida yaqin aloqalar mavjudligi aniqlangan.
Bu aloqalar ta’qib va ov jarayonlari bilan bog‘liq bo‘lib, ularni tasdiqlovchi izlar topilgan. Ushbu kashfiyotlar insoniyat tarixiga yangi ma’lumotlar qo‘shib, tabiat va hayvonot olamining murakkabligini yanada chuqurroq anglashga yordam bermoqda.
