Yevropaga kelayotgan qochoqlar soni kamaymoqda
Yevropa Ittifoqi hududida qochoqlik bo‘yicha arizalar soni sezilarli darajada kamaydi. Bu haqida Zamin.uz xabar berdi.
Bu holatning asosiy sababi sifatida Suriyada hukumat almashgani va mamlakatda barqarorlikka doir umidlarning paydo bo‘lishi ko‘rsatilmoqda. Yevropa Boshpana Agentligi ma’lumotlariga ko‘ra, 2025 yilning birinchi yarmida Yevropa Ittifoqi, Shveysariya va Norvegiyaga berilgan boshpana arizalari o‘tgan yilga nisbatan 23 foizga kamaygan.
Ushbu arizalarning taxminan 25 mingga yaqini suriyaliklar tomonidan taqdim etilgan bo‘lib, bu ko‘rsatkich o‘tgan yilning shu davriga qaraganda 66 foizga kamdir. Agentlik hisobotida qayd etilishicha, qochqinlar oqimidagi o‘zgarishlarni faqat migratsiya siyosatidagi choralar bilan izohlash qiyin.
Asosiy omil sifatida 2024 yil dekabrida Suriyada hukumat almashgani ko‘rsatildi. Suriyaning yangi rahbariyati barqarorlik va mamlakatni tiklashga intilayotgani tufayli ko‘plab fuqarolarda o‘z yurtlariga qaytish umidi yuzaga kelgan.
Bu holat Yevropaga bo‘lgan boshpana talabining kamayishiga sabab bo‘lmoqda. Shunday qilib, Suriyadagi siyosiy o‘zgarishlar va mamlakatdagi vaziyatning yaxshilanishi qochqinlar oqimiga sezilarli ta’sir ko‘rsatmoqda.
Yevropa Ittifoqi va boshqa davlatlar bu o‘zgarishlarni diqqat bilan kuzatib bormoqda.
