Isroil havo kuchlari tomonidan Qatar poytaxti Doha shahrida amalga oshirilgan havo hujumi kuchli portlashlarga sabab bo‘ldi. Bu haqida Zamin.uz xabar berdi.
Sabrien News xabariga ko‘ra, zarbalar Falastinning HAMAS harakatining asosiy qarorgohi bo‘lgan hududga qaratilgan. Qatar markazida o‘ndan ortiq kuchli portlashlar eshitildi.
Tel-Aviv rasmiylari ham havo hujumlarini tasdiqlab, operatsiya Isroil mudofaa kuchlari va umumiy xavfsizlik xizmati (Shabaq) hamkorligida amalga oshirilganini ma’lum qildi. Ularning aytishicha, hujum HAMASning yuqori darajali rahbarlariga qaratilgan, ammo aniq shaxslar oldindan e’lon qilinmadi.
Al-Arabiya nashrining xabariga ko‘ra, Dohadagi havo hujumi natijasida HAMASning G‘azo sektoridagi yetakchilaridan biri Halil al-Hayya va tashkilot rahbariyatining yana uch a’zosi halok bo‘ldi. Shuningdek, Isroil hududidagi yadroviy obyektlar ustidan uchuvchisiz samolyotlar orqali yangi tahdid e’lon qilindi.
Eslatib o‘tamiz, yaqinda HAMAS G‘azo sektori bo‘yicha muzokaralarga tayyorligini bildirgan edi, biroq hozirda Isroil urush harakatlarini kuchaytirmoqda. Ushbu voqea Yaqin Sharqdagi ziddiyatlarni yanada keskinlashtirib, mintaqadagi siyosiy va harbiy vaziyatni jiddiylashtirdi.
