Ukraina 18-22 yoshdagi erkaklarga chiqishga ruxsat berdi
Ukraina hukumati 18 yoshdan 22 yoshgacha bo‘lgan erkaklarga mamlakatdan chiqib ketishga ruxsat berdi. Bu haqida Zamin.uz xabar berdi.
Prezident Volodimir Zelenskiy ushbu qarorni e’lon qilib, yoshlar xohlasa, hech qanday to‘siqsiz qaytib kelishi mumkinligini bildirdi. Rossiya bosqini boshlangandan so‘ng 18 yoshdan 60 yoshgacha bo‘lgan erkaklarga chegaradan chiqishga taqiq qo‘yilgan edi.
Endilikda 22 yoshgacha bo‘lganlarga bu cheklov olib tashlandi. Shu sababli ko‘plab yigitlar Yevropa davlatlariga chiqib ketishga harakat qilmoqda.
Mutaxassislar fikricha, bu qaror mamlakatdagi aholining kamayishi va harbiy kuchlarning yetishmovchiligi sharoitida qabul qilindi. Urush va past tug‘ilish darajasi tufayli Ukraina aholisi taxminan 10 million kishiga qisqargani aytilmoqda.
Biroq yoshlarning qarashlari turlicha: ba’zilar xavfsizlik va kelajakni o‘ylab mamlakatdan chiqishni istasa, boshqalar esa Vatanida qolib, uni himoya qilishni o‘z burchi deb biladi. Ushbu qaror mamlakatdagi ijtimoiy va harbiy vaziyatni hisobga olgan holda qabul qilingan.
