Fransiyada ish o‘rinlari uchun norozilik namoyishi boshlandi

Fransiyada prezident Emmanuel Makronning ijtimoiy va iqtisodiy siyosatiga qarshi keng ko‘lamli norozilik namoyishlari bo‘lib o‘tmoqda. Bu haqida Zamin.uz xabar berdi.

Mamlakatning bir qator yirik shaharlarida, xususan Parij, Lion va Rennda yuzlab odamlar ko‘chalarga chiqdi. Namoyishchilar “Hammasini to‘xtat” shiori ostida hukumatning yangi siyosatiga qarshi o‘z noroziliklarini bildirmoqda.

Ular asosan ish o‘rinlarining qisqarishi, ijtimoiy ta’minotning zaiflashishi va turmush darajasining pasayishidan xavotirda ekanliklarini ta’kidlashmoqda. Renn shahrida vaziyat keskinlashib, aylanma yo‘llarda barrikadalar qurildi va ularga olov qo‘yildi.

Shuningdek, shaharning ayrim hududlarida avtobuslar va tramvay yo‘llariga zarar yetkazildi. Lion shahrida chiqindilar idishlari tramvay yo‘llariga ag‘darilib, yoqib yuborilgan.

Politsiya ma’lumotlariga ko‘ra, mamlakat bo‘ylab kamida 85 kishi hibsga olingan, ularning ko‘pchiligi Parijda ushlangan. Xavfsizlik kuchlari tartibsizliklarni bartaraf etishda ba’zida ko‘zdan yosh chiqaruvchi gaz ishlatishga majbur bo‘lgan.

Namoyishchilarning asosiy talablari ish o‘rinlarini saqlash, ijtimoiy himoyani kuchaytirish va turmush sharoitlarini yaxshilashga qaratilgan. Hukumat tomonidan amalga oshirilayotgan islohotlar oddiy aholining hayotiga salbiy ta’sir ko‘rsatmoqda, bu esa noroziliklarning asosiy sabablaridan biri hisoblanadi.

Mamlakatda vaziyat hali ham keskin va namoyishlarning davom etishi kutilmoqda.