Yaponiyada tarixiy kuchli tornado yuz berdi
Yaponiyaning Shizuoka prefekturasida mamlakat tarixida kuzatilgan eng kuchli tornado yuz berdi. Bu haqida Zamin.uz xabar berdi.
The Guardian nashrining ma’lumot berishicha, ushbu tabiiy ofat 3-darajali intensivlikda bo‘lib, shamol tezligi soatiga 270 kilometrga yetgan. Natijada 89 kishi turli darajada jarohatlangan, minglab aholi uy-joysiz qolgan.
Ayniqsa, Makinohara va Yoshida tumanlari eng ko‘p zarar ko‘rgan hududlar sifatida qayd etilgan. Kuchli shamol transport vositalarini ag‘darib, 1200 dan ortiq bino va boshqa inshootlarga katta zarar yetkazgan.
Yaponiya tarixida 1961 yildan beri jami 13 marta tornado ro‘y bergan, biroq ushbu voqea shunday kuchli halokat keltirgan birinchi holatdir. Mutaxassislar tornado sababini tropik bo‘ron Peipah bilan bog‘lashmoqda.
Bo‘ron mamlakatning turli hududlariga kuchli yomg‘ir va dovul olib kelgan. Hodisa davomida 24 kishi jarohatlangan, 40 dan ortiq uy vayron bo‘lgan, 14 mingdan ortiq xonadon elektr ta’minotisiz qolgan.
Hokimiyat organlari ofatdan oldin ehtiyot chorasi sifatida 600 mingdan ortiq aholini evakuatsiya qilish buyruqini bergan. Suv toshqini va ko‘chki xavfi inobatga olinib, fuqarolarga xavfsizlik qoidalariga qat’iy rioya qilish tavsiya qilingan.
Shu bilan birga, Nara prefekturasidagi Shimokitayama qishlog‘ida bir soat ichida 80 millimetr yomg‘ir yog‘di, Kumano shahrida esa 63 millimetr yog‘ingarchilik qayd etildi. Olimlar va ekspertlar ushbu tornado Yaponiyaning so‘nggi o‘n yillikdagi eng kuchli va eng katta zarar yetkazgan tabiiy ofati sifatida baholanmoqda.
Tabiatning bunday kuchli namoyon bo‘lishi hududlarda xavfsizlik choralarini kuchaytirish zaruratini ko‘rsatmoqda.
