Polshada ko‘ngilli harbiylar soni ikki barobar oshmoqda

Polshada Rossiya bilan bog‘liq xavotirlar ortib borayotgani sababli ko‘plab fuqarolar ko‘ngilli harbiy mashg‘ulotlarda faol ishtirok etmoqda. Bu haqida Zamin.uz xabar berdi.

Joriy yil davomida 20 mingdan ortiq odam ushbu mashg‘ulotlarga qatnashgan bo‘lsa, yil oxiriga kelib bu raqam 40 mingga yetishi kutilmoqda. Hukumat mudofaa sohasiga ajratilayotgan xarajatlarni sezilarli darajada oshirib, yalpi ichki mahsulotning 4,7 foizini armiyaga yo‘naltirmoqda.

Hozirda Polsha armiyasi 216 ming nafar xodimdan iborat bo‘lib, NATO doirasida AQSh va Turkiyadan keyingi uchinchi yirik kuch hisoblanadi. So‘nggi yillarda mamlakatning sharqiy hududlarida harbiy qismlar va mudofaa inshootlari mustahkamlanmoqda.

Mutaxassislarning fikriga ko‘ra, polyaklar Rossiyaning tahdidiga tarixiy tajriba asosida juda sezgir. Shu sababli ko‘ngillilarning soni oshib bormoqda va hukumat mudofaani mustahkamlash uchun zarur choralarni ko‘rmoqda.

Bu holat mamlakat mudofasining yanada kuchayishiga xizmat qilmoqda.