Misr arab davlatlari harbiy ittifoqini taklif qildi

Misr hukumati yaqinda arab davlatlari orasida yangi harbiy ittifoq tashkil etish tashabbusini qayta ko‘tardi. Bu haqda Zamin.uz xabar berdi.

Ushbu ittifoq shartli ravishda «Arab NATO»si deb atalishi mumkin. Bu haqda World Israel News nashri xabar berdi.

Ma’lumotlarga ko‘ra, bu g‘oya birinchi marta taxminan to‘qqiz yil oldin ilgari surilgan, ammo amalga oshmagan edi. So‘nggi paytlarda, ayniqsa Isroilning Qatarga nisbatan harbiy harakatlaridan keyin, bu masala yana dolzarblik kasb eta boshladi.

Qohira taklifiga ko‘ra, yangi ittifoq tuzilsa, Misr unga 20 mingga yaqin harbiy xizmatchisini yo‘naltirishga tayyor. Shuningdek, zarurat tug‘ilganda foydalanish mumkin bo‘lgan maxsus mexanizm ishlab chiqiladi.

Bu mexanizm arab davlatlari armiyalari va aholisi uchun mos tarzda tashkil etiladi. Nomi oshkor etilmagan misrlik rasmiyning aytishicha, ushbu harbiy birlashmani boshqarishda yetakchi rolni Misr o‘z zimmasiga oladi.

Undan keyingi o‘rinda Saudiya Arabistoni turadi, so‘ngra Fors ko‘rfazi davlatlaridan biri asosiy sherik sifatida ishtirok etadi. Shu tariqa, Qohira mintaqadagi arab davlatlarini yagona mudofaa tizimida birlashtirish orqali o‘zining geosiyosiy mavqeini oshirishga intilmoqda.

Bu tashabbus mintaqaviy barqarorlik va xavfsizlikni mustahkamlashga xizmat qilishi kutilmoqda.