Tramp samolyoti Nyu-Yorkda xavfli vaziyatga tushdi
AQSH prezidenti Donald Tramp va uning rafiqasi Londonga uchayotgan paytda jiddiy xavf yuzaga kelgan. Bu haqda Zamin.uz xabar berdi.
Prezidentni olib ketayotgan Boeing 747 samolyoti Nyu-York osmonida Spirit Airlines aviakompaniyasining yo‘lovchi samolyoti bilan to‘qnashib ketishga yaqin bo‘lgan. Aviodispetcherlar vaziyatning xavfli ekanini tezda aniqlab, Fort-Loderdeyldan Bostonga uchayotgan Spirit 1300 reysi ekipajiga yo‘nalishni o‘zgartirish bo‘yicha shoshilinch buyruq bergan.
Natijada, samolyotlar bir necha mil masofada ajralib, xavfsizlik qoidalari buzilmagan. Tramp 16-sentyabr kuni rafiqasi bilan Buyuk Britaniyaga davlat tashrifi bilan yo‘lga chiqqan.
Bu uning tarixdagi ikkinchi rasmiy safaridir. Birinchi tashrif 2019-yilda amalga oshirilgan bo‘lib, undan oldin hech bir Amerika prezidenti qirollik protokoli asosida shunday darajada taklif qilinmagan edi.
Prezidentlik juftligi 17-sentyabr kuni Vindzor qasrida qirol Charlz III tomonidan tantanali kutib olindi. Safar davomida Tramp Buyuk Britaniya bosh vaziri Kir Starmer bilan muzokaralar o‘tkazishi rejalashtirilgan.
Manbalarga ko‘ra, Vashington va London ushbu tashrif davomida 10 milliard dollardan ortiq qiymatdagi iqtisodiy shartnomalarni imzolashi kutilmoqda. Bu kelishuvlar ikki davlat o‘rtasidagi strategik hamkorlikni yanada mustahkamlashga xizmat qiladi.
Tashrifning asosiy maqsadi siyosiy va iqtisodiy aloqalarni rivojlantirishdan iboratdir.
