Erdo‘g‘an: Turkiya Quddusni himoya qiladi doim
Turkiya prezidenti Rajab Toyyib Erdo‘g‘an Istanbulda o‘tkazilgan TEKNOFEST tadbirida so‘zlagan nutqida Isroil bosh vaziri Binyamin Netanyaxuning Quddus borasidagi bayonotlariga qattiq javob berdi. Bu haqda Zamin.uz xabar berdi.
U shuni ta’kidliki, qaysi darajada bosim o‘tkazilmasin, Turkiya va musulmon dunyosi Quddusni himoya qilishdan hech qachon chekinmaydi. Erdo‘g‘an nutqida Quddus nafaqat musulmonlar uchun, balki butun insoniyat uchun muqaddas shahar ekanligini qayd etdi.
Uning so‘zlariga ko‘ra, birinchi qibla bo‘lgan Quddusga qilingan har qanday tahdid butun insoniyat sha’niga qarshi qilingan hujumdir. Bunday zulm va tajovuzga qarshi qat’iy choralar ko‘rilishi lozim.
Bu bayonotlar Isroil bosh vaziri Binyamin Netanyaxuning AQSh davlat kotibi bilan birga 15 sentyabr kuni bahsli sanalgan “Dovud shahri” arxeologik yodgorligiga tashrifidan so‘ng bildirildi. Netanyaxu miloddan avvalgi sakkizinchi asrga oid qadimiy “silvan yozuvi” asosida Quddus tarixiga da’vo qilib, bu shahar abadiy Isroilga tegishli ekanligini e’lon qilgan edi.
Shunga javoban Erdo‘g‘an nafaqat 2700 yillik yozuv, balki Quddusga tegishli har qanday qadimiy ashyolar Isroilga berilmasligini qat’iy ta’kidladi. U, shuningdek, begunoh insonlar qoniga botgan qotillar Quddus taqdiri haqida o‘zboshimchalik bilan qaror qabul qilishga haqli emasligini bildirdi.
Turkiya prezidenti Quddusni musulmonlar va butun insoniyat uchun sharaf maskani deb atadi va bu muqaddas yerga qilingan har qanday hujum xalqaro hamjamiyat tomonidan qattiq tanqid qilinishini ta’kidladi. Bir necha kun avval Erdo‘g‘an Isroil bosh vazirini Adolf Gitlerga qiyoslab, ikki milliard musulmonning umumiy merosi bo‘lgan Quddus hech qachon himoyasiz qolmasligini ma’lum qilgandi.
Eslatib o‘tamiz, Isroil 1967 yildagi Olti kunlik urushdan so‘ng Sharqiy Quddusni bosib olib, uni o‘zining bo‘linmas poytaxti deb e’lon qilgan. Xalqaro hamjamiyat esa Sharqiy Quddus mustaqil Falastin davlatining poytaxti bo‘lishi kerakligini ta’kidlamoqda.
So‘nggi yillarda Isroilning Al-Aqso masjidi va boshqa muqaddas joylarga qarshi tajovuzkor harakatlari xalqaro maydonda keskin qoralanmoqda.
