Singapur 2024-yilda yana eng xavfsiz davlat tanlandi
Singapur yana bir bor dunyo miqyosida eng xavfsiz davlat sifatida tan olindi. Bu haqda Zamin.uz xabar berdi.
“Sinxua” axborot agentligining xabariga ko‘ra, Singapur 2006-yildan buyon Gellap institutining Global xavfsizlik hisobotida 12-marta birinchi o‘rinni egalladi. Hisobotda 2024-yilda singapurliklarning 98 foizi kechqurun yoki tunda yolg‘iz ko‘chada yurganida o‘zini mutlaqo xavfsiz his qilgani qayd etilgan.
Bu ko‘rsatkich dunyo bo‘yicha eng yuqori darajalardan biri hisoblanadi. So‘rov natijalari shuni ko‘rsatdiki, xavfsizlik hissi erkaklar va ayollar orasida deyarli farq qilmagan.
2024-yilda erkaklarning 98 foizi, ayollarning esa 97 foizi o‘zini xavfsiz deb hisoblagan. Bu mamlakatdagi xavfsizlik va jamoat tartibining barqarorligini ko‘rsatadi.
Gellap instituti hisobotida ta’kidlanishicha, Singapurdagi yuqori xavfsizlik darajasi jinoyatchilikning pastligi, huquq-tartibot organlarining samarali ishlashi va aholi orasidagi madaniyatning yuqori darajasi bilan bog‘liq. Mamlakatda xavfsizlik siyosati nafaqat davlat, balki fuqarolarning mas’uliyatli munosabati orqali ham ta’minlanmoqda.
Shu sababli Singapur xalqaro maydonda o‘zining nufuzini yanada mustahkamladi va dunyoning eng xavfsiz davlatlaridan biri sifatida e’tirof etilmoqda.
