Avstraliyada 11 million yillik asteroid izlari topildi
Avstraliyada ilgari noma’lum bo‘lgan asteroid izlari topildi. Bu haqda Zamin.uz xabar berdi.
Bu haqda “Earth and Planetary Science Letters” ilmiy jurnali ma’lumot berdi. Kashfiyot kosmik zarbalardan hosil bo‘lgan tabiiy shisha — tektitlar muzeydagi namunalarini qayta tahlil qilish orqali amalga oshirildi.
Mutaxassislar tarkibi o‘ziga xos, yoshi taxminan 11 million yil bo‘lgan, ilgari qayd etilmagan yangi turdagi tektitlarni aniqladi. Olimlar yangi topilmalarni Avstralaziya sochilma maydonidagi mashhur tektitlar bilan solishtirdi.
Avvalgi namunalar qariyb 780 ming yilga teng bo‘lib, Yer yuzida keng tarqalgan. Yangi topilmalar esa taxminan 15 baravar qadimiy va faqat cheklangan hududda uchraydi.
Bu ularning boshqa kosmik hodisa natijasida yuzaga kelganini ko‘rsatadi. Shu bilan birga, hozircha zarba natijasidagi aniq krater topilmadi.
Tadqiqotchilar ta’kidlaganidek, qadimgi asteroid urilishlarining chastotasi va quvvatini o‘rganish kelajakda yuzaga kelishi mumkin bo‘lgan xavflarni baholash hamda sayyorani himoya qilish usullarini ishlab chiqishda muhim ahamiyatga ega. Eslatib o‘tamiz, shu yil Yerga eng yirik asteroidlardan biri yaqinlashib, Oy atrofidan taxminan 800 ming kilometr masofada xavfsiz uchib o‘tgan edi.
