Saudiya Arabistoni Yamanga 368 million dollar yordam berdi
Saudiya Arabistoni rasmiylari ma’lumotiga ko‘ra, Yamanning xalqaro maydonda tan olingan hukumatiga yangi moliyaviy yordam ajratildi. Bu haqda Zamin.uz xabar berdi.
Yangi yordam miqdori 1,38 milliard saud riyoli, ya’ni taxminan 368 million AQSH dollarini tashkil etadi. Bu haqda Saudiya Arabistoni Tashqi ishlar vazirligi bayonot berdi.
Ajratilgan mablag‘lar «Yamanni rivojlantirish va qayta tiklash dasturi» doirasida berilmoqda. Ushbu mablag‘lar Yaman davlat budjetiga to‘g‘ridan to‘g‘ri yo‘naltiriladi.
Bundan tashqari, yoqilg‘i mahsulotlari xarajatlarini qoplash va Aden shahridagi Muhammad bin Salmon nomidagi shifoxonaning faoliyatiga sarflanishi rejalashtirilgan. BMT ma’lumotlariga ko‘ra, Yamandagi vaziyat og‘irligicha qolmoqda.
Mamlakat aholisi taxminan 80 foizi, ya’ni 24 milliondan ortiq kishi insonparvarlik yordamiga muhtoj. Shuningdek, 4 milliondan ziyod ichki ko‘chirilgan shaxslar mavjudligi qayd etilgan.
Bu yordamning aholi hayotini yaxshilashda muhim ahamiyatga ega bo‘lishi kutilmoqda.
