Singapurda elektron sigaretalar va K-podlar taqiqlanadi
Singapurda 1 sentyabrdan boshlab isitiladigan tamaki mahsulotlari, jumladan IQOS va boshqa shunga o‘xshash qurilmalar hamda elektron sigaretalar, xususan K-podlar va etimidat tarkibli vaplar qonuniy ravishda taqiqlanadi. Bu haqda Zamin.uz xabar berdi.
Bu haqda Singapur Tashqi ishlar vazirligi matbuot xizmati ma’lum qildi. Yangi qonunga muvofiq, Singapur hududiga elektron sigaretalar va isitiladigan tamaki mahsulotlarini olib kirish, sotish, egalik qilish hamda ulardan foydalanish qat’iyan man etiladi.
Qonun buzilgan taqdirda jazo choralariga duch kelish mumkin. Masalan, egalik qilish yoki chekish holatida 2000 singapur dollarigacha jarima solinadi.
Sotish yoki import qilish uchun esa 10 000 AQSh dollarigacha jarima yoki olti oygacha qamoq jazosi qo‘llaniladi. Takroriy huquqbuzarliklarda jarima miqdori 20 000 AQSh dollarigacha ko‘tariladi va qamoq muddati 12 oygacha uzaytiriladi.
Shuningdek, takroriy huquqbuzarliklar majburiy reabilitatsiya dasturiga jalb etilishi va keyinchalik jinoiy javobgarlikka olib kelishi mumkin. Singapur K-pod turidagi vaplarni giyohvand moddalar bilan bog‘liq qurilmalar deb hisoblaydi.
Etimidat esa S sinfidagi dori vositasi sifatida rasmiy ro‘yxatga kiritilgan. Uning egalik qilinishi yoki foydalanilishi majburiy nazorat va reabilitatsiya dasturiga jalb qilishni, takroriy jinoyatlarda esa jinoiy javobgarlikni keltirib chiqaradi.
Kontrabanda uchun 3 dan 20 yilgacha qamoq va 5 dan 15 zarbacha jazo belgilangan. Sotish va tarqatish holatlarida esa 2 dan 10 yilgacha qamoq va 2 dan 5 zarbacha jazolar qo‘llaniladi.
Ushbu qonun Singapur fuqarolari bilan birga barcha chet elliklarga, jumladan talaba va ish vizasi egalari uchun ham amal qiladi. Qonunni buzgan shaxslar hibsga olinishi, katta miqdorda jarimaga tortilishi, deportatsiya qilinishi va keyin Singapurga kirishi taqiqlanishi mumkin.
O‘zbekiston fuqarolariga Singapurga elektron sigaretalar va K-podlarni olib kirish qat’iyan tavsiya etilmaydi. Bu chora-tadbirlar xorijdagi turistlar va mehnat muhojirlari uchun huquqiy xavfsizlikni ta’minlash hamda soliq va ma’muriy qoidalarga rioya qilishning muhimligini yana bir bor ko‘rsatdi.
Singapurda ushbu qoidalarga qat’iy amal qilish zarur.
