Bugungi kunda suv eng qimmatli tabiiy resurs hisoblanadi va G‘azoda bir stakan suv uchun inson hayoti qurbon bo‘lmoqda. Bu haqda Zamin.uz xabar berdi.
Turkiya Prezidenti rafiqasi hamda BMTning “Nol chiqindi” bo‘yicha Oliy darajali maslahat kengashi raisi Emina Erdo‘g‘an Nyu-York shahrida Turkiya Atrof-muhit, shahar ishlari va iqlim o‘zgarishi vazirligi tomonidan tashkil etilgan “Nol chiqindi – tomchi-tomchi” ko‘rgazmasida bu muhim masala yuzasidan fikrlarini bildirdi. Erdo‘g‘an ta’kidicha, insoniyat hozirgi kunda suvni genotsid quroli sifatida ishlatilayotgan murakkab va og‘ir davrda yashamoqda.
2023 yilning 7 oktyabridan boshlab Isroil o‘z harbiy hujumlari davomida G‘azoning suv infratuzilmasini maqsadli ravishda vayron qilmoqda. Natijada suv quvurlari, tozalash inshootlari, quduqlar va boshqa infratuzilmalarining 85 foizi faoliyat ko‘rsatmayapti.
Falastinliklar kundalik suv ehtiyojini qondirish uchun uzoq masofalarni piyoda bosib o‘tishga majbur. Ba’zida navbatda turgan paytda raketa zarbalaridan halok bo‘ladilar.
Kichik bolalar og‘irroq suv idishlarini ko‘tarishda qiynalmoqda, bu esa insoniyat vijdoniga katta zarba bo‘lmoqda. Odamlar yaroqsiz suv ichishga majbur bo‘lmoqda.
G‘azoda axloqiy, huquqiy va gumanitar me’yorlar deyarli yo‘qolgan. Bolalar “Ona, kechki ovqatga nima yeymiz?” deb so‘ra olmaydigan sharoitga tushib qolgan.
Axloqiy kompasni yo‘qotgan davlat insoniyat vijdoni bilan kurash boshlagan. Insoniyat bu kurashda mag‘lub bo‘lmasligi kerak, dedi Turkiya birinchi xonimi.
Emina Erdo‘g‘an suv va non qurol sifatida ishlatilmasligi, xalqaro huquq va umuminsoniy qadriyatlarga hurmat bilan yondashilishi kerakligini ta’kidladi. U adolatli va barqaror dunyo uchun umid bildirdi.
Uning fikricha, bu insoniyatning huquq va qadriyatlarini himoya qilishda muhim qadamdir hamda global adolat yo‘lida katta ahamiyatga ega.
