Shri-Lankada teleferik halokatida yetti rohib halok bo‘ldi
Shri-Lankaning Pansiyagama hududida joylashgan Na Uyana monastirida katta falokat sodir bo‘ldi. Bu haqda Zamin.uz xabar berdi.
Ma’lumotlarga ko‘ra, 24-sentyabr kuni mahalliy vaqt bilan soat 21:00 larda teleferik halokatiga uchragan va yetti buddaviy rohib vafot etgan. Bu haqda Daily Mirror nashri xabar berdi.
Halokatda halok bo‘lganlar orasida Rossiya, Ruminiya va Hindiston fuqarolari ham borligi ma’lum bo‘ldi. Jabrlanuvchilarning jasadlari Gokarella va Kurunegala shifoxonalariga olib ketilgan.
Hodisa vaqtida jami 13 nafar rohib monastirdagi diniy marosimdan so‘ng qaytayotgan edi. Ikki rohib vagondan sakrab tushib yengil jarohat olgan, yana to‘rt kishi esa og‘ir holatda shifoxonaga yetkazilgan.
Rasmiy manbalarning dastlabki ma’lumotlariga ko‘ra, falokat teleferikni ushlab turgan asosiy kabelning uzilishi natijasida yuzaga kelgan. Hozirda Pansiyagama politsiyasi hodisa bo‘yicha tergov ishlarini olib bormoqda.
Ushbu voqea hududda xavfsizlik va texnik nazorat masalalarining qanchalik muhim ekanligini yana bir bor ko‘rsatdi. Tegishli organlar hodisaning sabablarini aniqlash va kelgusida bunday holatlarning oldini olish uchun zarur choralarni ko‘rmoqda.
