Dubrovnikda sayyohlar oqimi yangi qoidalarga bo‘ysunadi
Xorvatiyaning Dubrovnik shahri so‘nggi yillarda sayyohlar sonining keskin oshishi bilan bog‘liq muammolarga duch kelmoqda. Bu haqda Zamin.uz xabar berdi.
Shaharda yashovchilarga nisbatan sayyohlar soni 27 barobarga oshganligi mahalliy hayot va tarixiy merosga salbiy ta’sir ko‘rsatmoqda. Bu holat shaharning tabiiy va madaniy muhitini saqlashni qiyinlashtirmoqda.
Shahar hokimi Mato Frankovich turizm oqimini tartibga solish maqsadida yangi choralarni joriy etdi. Endilikda kemalar soni kuniga faqat ikki taga cheklangan va ular kamida sakkiz soat davomida shaharda qolishi shartligi belgilandi.
Dubrovnik Pass tizimi orqali shahar devorlari va muzeylarga tashrif buyurish uchun oldindan vaqtni bron qilish talab qilinadi. Bundan tashqari, tarixiy hududdagi ba’zi binolar sotib olinib, yosh oilalarga ijaraga berilmoqda.
Sobiq saroyda maktab ochilishi esa shahar markazida aholining qaytishini rag‘batlantirmoqda. Ushbu chora-tadbirlar qisqa muddatli ijara va shovqinli sayyohlikni kamaytirishga qaratilgan.
Mutaxassislar fikricha, Dubrovnik shahri turizmni to‘xtatmasdan, uni boshqarish orqali shaharni va uning madaniy merosini asrab qolmoqda. Hokimning ta’kidlashicha, asosiy maqsad – aholining hayot sifatini yaxshilash va sayyohlikni uzoq muddatli barqaror darajaga olib chiqishdir.
Bu chora-tadbirlar shaharning kelajakdagi rivojlanishi va turizmning muvozanatli rivojlanishini ta’minlashga xizmat qiladi.
