Moldovada parlament saylovlari ertalab boshlandi

Moldova Respublikasida mahalliy vaqt bilan soat 07:00 da parlament saylovlari boshlandi. Bu haqda Zamin.uz xabar berdi.

Markaziy saylov komissiyasining ma’lumotiga ko‘ra, mamlakat bo‘ylab jami 1961 ta ovoz berish uchastkasi faoliyat yuritmoqda. Shuningdek, xorijda 301 ta saylov punkti tashkil etilgan bo‘lib, ularning ovoz berish vaqti joylashuvga qarab belgilanadi.

Ushbu saylovda amaldagi prezident Mayya Sandu yetakchiligidagi Yevropa Ittifoqiga qo‘shilish tarafdori “Harakat va birdamlik” partiyasi uchta rossiyaparast siyosiy kuchga qarshi kurashmoqda. Rossiyaparast kuchlar orasida “Vatanparvarlar” bloki, “Alternativa” bloki va “Bizning partiyamiz” partiyasi mavjud.

Bundan tashqari, saylovdan oldin yana ikki partiya ro‘yxatdan chiqarilgan. Prezident Mayya Sandu o‘z murojaatida saylovning mamlakat uchun muhimligini ta’kidlab, parlamentning kelajak taqdirini belgilashda asosiy rol o‘ynashini bildirdi.

U Yevropa Ittifoqiga a’zolik masalasining eng dolzarb masala ekanini aytdi. Shuningdek, Kreml rossiyaparast partiyalarni moliyalashtirish va ovozlarni sotib olish uchun yuzlab million yevro ajratganini ma’lum qildi.

Prezident Sandu mamlakat ravnaqi uchun adolatli va haqqoniy ovoz berishga chaqirdi.