Hindistonning janubiy Tamilnad shtatida siyosiy tadbirda yuzaga kelgan tiqilinch natijasida kamida 39 kishi halok bo‘ldi. Bu haqda Zamin.uz xabar berdi.
Karur okrugida o‘tkazilgan saylovoldi mitingda mashhur aktyor va siyosatchi Vidjay ishtirok etgan edi. Rasmiy ma’lumotlarga ko‘ra, halok bo‘lganlar orasida ayollar, erkaklar va bolalar ham bor.
Tadbir shanba kuni bo‘lib o‘tdi va unda o‘n minglab odam qatnashdi. Mahalliy ommaviy axborot vositalarining xabar berishicha, miting belgilangan vaqtdan kech boshlangani sababli olomon orasida tartibsizlik yuzaga kelgan.
Televideniyeda tarqatilgan videolarda odamlar hushini yo‘qotib, yerga yiqilib tushayotganlari aks etgan. Siyosatchi Sentil Balaji jurnalistlarga bergan ma’lumotida halok bo‘lganlar sonini tasdiqladi va 50 dan ortiq odam jarohatlanganini ma’lum qildi.
Tamilnad sog‘liqni saqlash vaziri Ma Subramanian qurbonlar orasida 16 nafar ayol, 9 nafar erkak va 6 nafar bola borligini aytdi. Hukumat rahbari Mutxuvel Karunanidxi Stalinning ma’lumotiga ko‘ra, ko‘plab odamlar tiqilinchda hushini yo‘qotib, shifoxonalarga olib ketilgan.
Jarohatlanganlarga yordam berish uchun qo‘shni hududlardan shifokorlar chaqirilgan. Qurbonlarning oilalariga bir million rupiy tovon puli berilishi belgilangan.
Fojea yuzasidan tekshiruv ishlari boshlangan. Vidjay internet orqali chiqish qilganida o‘zini “chilparchin bo‘lgan qalb” va “chidab bo‘lmas og‘riq” bilan his qilayotganini bildirgan.
U qurbonlarning yaqinlariga chuqur hamdardlik bildirdi va jarohatlanganlarga tezda sog‘ayib ketishini tiladi. Hindiston bosh vaziri Narendra Modi ijtimoiy tarmoqlarda bu voqeani “qayg‘uli baxtsiz hodisa” deb atadi.
Mamlakatda olomon orasida tiqilinchlar so‘nggi yillarda tez-tez sodir bo‘lmoqda. Joriy yil ichida Kumbx Mela festivali va “Royal Challengers” kriket jamoasining g‘alabasini nishonlash vaqtida ham shunga o‘xshash fojiali holatlar ro‘y berdi.
