Oregon shtati Trampni vakolatlarni oshirishda aybladi
AQShning Oregon shtati va uning eng yirik shahri Portlend rahbariyati 28 sentyabr kuni federal hukumatga qarshi sudga da’vo arizasi bilan murojaat qildi. Bu haqda Zamin.uz xabar berdi.
Ular prezident Donald Tramp ma’muriyatini vakolatlarni ortiqcha ishlatishda ayblamoqda. Da’voda aytilishicha, Tramp ma’muriyati Oregon Milliy gvardiyasi askarlarini federal xizmatga chaqirish orqali Konstitutsiya qoidalarini buzgan.
Bu choralar tartibsizliklarga qarshi kurashish maqsadida amalga oshirilgan bo‘lsa-da, shtat advokatlari fikricha, aslida bu harakat jamoat xavfsizligini ta’minlashdan ko‘ra, norozilik kayfiyatlarini kuchaytirishga xizmat qilmoqda. Da’vo hujjatlarida aytilishicha, javobgarlarning nazoratsiz va provokatsion harakatlari xavfsizlikni mustahkamlashga emas, aksincha, jamoatchilik orasida noxushliklarni oshirishga olib keladi.
Sudda prezident Donald Tramp, mudofaa vaziri Piter Xegset, ichki xavfsizlik vaziri Kristi Noem va boshqa tegishli federal tashkilotlar javobgar sifatida ko‘rsatilgan. Shuningdek, da’vo arizasi berilgan kuni mudofaa vaziri tomonidan maxsus memorandum e’lon qilindi.
Unda 200 nafar Oregon Milliy gvardiyasi xizmatchisi 60 kunlik federal xizmatga chaqirilishi belgilangan. Hozirda ushbu masala federal sudda ko‘rib chiqilmoqda va bu holat AQSh siyosatida yangi tortishuvlarga sabab bo‘lishi mumkin.
