Oregon Trampning Milliy gvardiya qarorini sudga berdi
Oregon shtati va uning eng yirik shahri Portlend rahbariyati Amerika Qo‘shma Shtatlari hukumatiga qarshi sudga da’vo arizasi topshirdi. Bu haqda Zamin.uz xabar berdi.
Mahalliy ommaviy axborot vositalari bu haqda ma’lumot berdi. 28 sentyabr kuni taqdim etilgan arizada qayd etilishicha, prezident Donald Tramp norozilik namoyishlariga javoban Milliy gvardiya askarlarini federal xizmatga chaqirish orqali o‘z vakolatlarini oshirib yuborgan.
Advokatlarning ta’kidlashicha, ushbu qaror Amerika Qo‘shma Shtatlari Konstitutsiyasining tamoyillariga zid bo‘lib, tartibsizliklarni bostirish o‘rniga jamoat xavfsizligiga salbiy ta’sir ko‘rsatishi mumkin. Hujjatda aytilishicha, javobgarlarning provokatsion va o‘zboshimchalik harakatlari norozilik kayfiyatini kuchaytirib, xavfsizlikka zarar yetkazishi ehtimoldan holi emas.
Da’vo arizasida prezident Donald Tramp, mudofaa vaziri Piter Xegset, ichki xavfsizlik vaziri Kristi Noem hamda tegishli federal idoralar javobgar sifatida ko‘rsatilgan. Shu kuni mudofaa vaziri Piter Xegset Oregon Milliy gvardiyasining 200 nafar askarini darhol 60 kun muddatga federal xizmatga chaqirish haqida memorandum chiqargan edi.
Bu holat davlat hokimiyati organlari vakolatlarini buzilishiga oid jiddiy masala sifatida ko‘rilmoqda.
