Londondagi sud 47 yoshli Xitoy fuqarosi Chjimin Syanni 6,7 milliard dollarlik bitkoinlarni noqonuniy yo‘l bilan qo‘lga kiritishda aybdor deb topdi. Bu haqda Zamin.uz xabar berdi.
U ushbu mablag‘larni Buyuk Britaniyada qimmatbaho ko‘chmas mulk sotib olish uchun ishlatishga harakat qilgan. Bu haqda Skotland-Yardning rasmiy sayti ma’lumot berdi.
Tergov jarayonida ayoldan 61 mingdan ortiq bitkoin musodara qilindi, bu kriptovalyutalar tarixidagi eng yirik musodara hisoblanadi. Tekshiruv natijalariga ko‘ra, Syan 2014 yildan 2017 yilgacha 128 mingdan ziyod Xitoy fuqarosini, jumladan tadbirkorlar, nafaqaxo‘rlar, bank xodimlari va sud tizimi vakillarini turli usullar bilan aldagan.
U qo‘lga kiritgan katta mablag‘larni bitkoinlarga aylantirib, soxta hujjatlar yordamida Buyuk Britaniyaga ko‘chib o‘tgan. Bu yerda qimmatbaho uy-joylar sotib olib, mablag‘larni qonuniylashtirishni maqsad qilgan.
The Sun gazetasi ma’lumotiga ko‘ra, politsiya Syanning shaxsiy kundaligini topgan, unda u o‘zini Dalay Lama tomonidan moylangan “qayta tug‘ilgan ma’buda” deb hisoblashini va “Liberland” nomli mustaqil davlat tashkil etib, unda malika sifatida hukmronlik qilishni orzu qilganini yozgan. Hozirda ayol hibsda bo‘lib, sud hukmini kutmoqda.
Ushbu ish nafaqat moliyaviy firibgarlik, balki kriptovalyutalar orqali jinoyatlar qanchalik keng ko‘lamda sodir etilishi mumkinligini yana bir bor ko‘rsatdi.
