Olmaotada muddatli askar o‘limi yuzasidan tergov talab qilinmoqda

Qozog‘istonning Olmaota shahrida joylashgan chegara xizmati bo‘linmasida muddatli harbiy xizmatga yaqinda chaqirilgan yosh askar vafot etdi. Bu haqda Zamin.uz xabar berdi.

Nurasil Anuar ismli yigit 2025 yil 27 sentyabr kuni “Qorasoy” chegara qismiga xizmatga jo‘natilgan edi. U xizmatni boshlagani yetti kun ham bo‘lmay turib hayotdan ko‘z yumdi.

Bu haqda mahalliy OAVlar xabar berdi. Oila a’zolari o‘lim haqida 5 oktyabr kuni ertalab xabar olgan.

Ular uchun bu yangilik katta zarba bo‘ldi, chunki Nurasil sog‘lom va kelajakka umid bilan qaragan yosh edi. Qarindoshlari uning harbiy xizmatni vatan oldidagi burch va sharaf deb bilganini ta’kidlamoqda.

Dastlabki ma’lumotlarga ko‘ra, Nurasilning o‘limiga meningit sabab bo‘lgan bo‘lishi mumkin. Ammo oila bu tashxisga shubha bilan qaramoqda, chunki yosh askar xizmatga ketishidan oldin sog‘lom edi va hech qanday kasallik belgisi kuzatilmagan.

Marhumning qarindoshlari jasadni ko‘rishga ruxsat berilmayotgani va voqea yuzasidan to‘liq, xolis tergov o‘tkazilishini talab qilmoqda. Ular bu holat tasodif emas, deb hisoblaydi va adolatli qaror chiqishini so‘ramoqda.

Nurasil mehribon, samimiy va toza qalbli inson bo‘lgan. Uning vafoti oilasi uchun katta yo‘qotishdir.

Shunga o‘xshash holatlar Qozog‘istonda avval ham sodir bo‘lgan. Jumladan, shu yilning 17 sentyabrida Mang‘istau viloyatida xizmat qilayotgan yosh askar Dinmuhammad ham halok bo‘lgan edi.

Rasmiylar uning o‘limini o‘z joniga qasd qilish deb baholagan, ammo qarindoshlari bunga ishonmagan. Nurasilning o‘limi Qozog‘istonda harbiy xizmatchilarning xavfsizligi va sog‘lig‘i bilan bog‘liq muammolar mavjudligini yana bir bor ko‘rsatdi.

Hozircha rasmiylar bu masala yuzasidan aniq izoh bermagan. Marhumning yaqinlari esa haqiqatni aniqlash uchun kurashdan to‘xtamaslikka qaror qilgan.