Shimoliy Koreya rahbari Kim Chen In AQShning Janubiy Koreyada harbiy kuchlarini kuchaytirishiga javoban mamlakatning «maxsus resurslar»ini faollashtirganini ma’lum qildi. Bu haqda Zamin.uz xabar berdi.
Bu haqda u Koreya Mehnat partiyasining tashkil topganining 80 yilligiga bag‘ishlangan harbiy ko‘rgazmada so‘zladi. Bayonot 5 oktyabr, yakshanba kuni Koreya markaziy televideniyasi tomonidan e’lon qilindi.
Kim Chen In dushmanlar o‘z xavfsizligi haqida jiddiy o‘ylashi lozimligini ta’kidladi. Uning so‘zlariga ko‘ra, AQSh va Janubiy Koreya o‘rtasidagi yadroviy ittifoq tez sur’atlarda rivojlanmoqda, shuningdek, xavfli ssenariylarni sinash uchun turli harbiy mashqlar o‘tkazilmoqda.
AQShning janubdagi harbiy salohiyatini oshirishi mintaqada Shimoliy Koreyaning strategik xavotirlarini kuchaytirmoqda. Koreya markaziy televideniyasi «maxsus resurslar»ning aniq mazmunini oshkor qilmagan.
Biroq e’lon qilingan suratlarda Kim Chen In yopiq pavilonda generallar bilan birga turli qurol va raketalar qatoridan o‘tayotganini ko‘rish mumkin. Seul rasmiylari Pxenyan Rossiya bilan harbiy hamkorlikni mustahkamlab, Xitoy bilan aloqalarni yanada chuqurlashtirayotganini bildiradi.
Shuningdek, Kim Chen In sentabr oyida Xitoyga tashrif buyurgan. AFP xabariga ko‘ra, AQSh Koreya yarimorolining janubiy qismida taxminan 28,5 ming askarini doimiy joylashtirgan.
Bundan tashqari, Vashington 15-19 sentabr kunlari Janubiy Koreya va Yaponiya bilan Iron Mace nomli qo‘shma harbiy mashqlarni o‘tkazgan. Harbiy so‘zlashuvlar kuchaygan bir vaqtda Shimoliy Koreyaning «maxsus resurslar» haqidagi bayonoti mintaqadagi xavfsizlik va muvozanat holatining yanada murakkablashganidan dalolat beradi.
