Janubiy Filippinda 7,4 balli zilzila sodir bo‘ldi

Janubiy Filippinda 10 oktyabr kuni 7,4 balli kuchli zilzila sodir bo‘ldi. Bu haqda Zamin.uz xabar berdi.

Filippin vulqonologiya va seysmologiya instituti (PHIVOLCS) ma’lumotiga ko‘ra, zilzilaning epitsentri Davao Oriyental viloyatining Manay shahri yaqinida, dengiz tubida joylashgan bo‘lib, zarbaning chuqurligi taxminan 23 kilometrni tashkil etdi. Zilzila natijasida mamlakatning bir qator sohil hududlarida sunami xavfi yuzaga keldi.

Rasmiylar aholini yuqori yerlarga evakuatsiya qilishga chaqirdi. Dastlabki ma’lumotlarga ko‘ra, xavfsizlik choralarini kuchaytirish maqsadida sohildagi maktablar va turizm obyektlari vaqtincha yopildi.

Mahalliy ommaviy axborot vositalarining xabar berishicha, zilzila oqibatida kamida bir kishi halok bo‘lgan, bir necha bino va turar joylarga zarar yetgan. Davao shahridagi ba’zi ta’lim muassasalarida talabalar shoshilinch evakuatsiya qilindi, bir necha kishi yengil tan jarohati oldi.

Davao xalqaro aeroportida parvozlar qisqa muddatga to‘xtatildi, ammo tez orada faoliyat tiklandi. Prezident Ferdinand Markos Junior vaziyatni shaxsan nazoratga olganini ma’lum qildi.

Hukumat tomonidan qutqaruv ishlari va tezkor baholash boshlangan. Shuningdek, jabr ko‘rgan aholiga yordam ko‘rsatish uchun maxsus shtab tashkil etildi.

Seysmologlarning ta’kidlashicha, Filippin Tinch okeanidagi “Olov halqasi” deb ataladigan faol seysmik mintaqada joylashganligi sababli yer qimirlashlari tez-tez sodir bo‘ladi. So‘nggi yillarda Sebu va Mindanao hududlarida ham kuchli zilzilalar qayd etilgan va ular katta iqtisodiy zarar keltirgan.

Mahalliy hokimiyat va xalqaro tashkilotlar aholini faqat rasmiy manbalar orqali axborotni kuzatib borishga, ehtiyotkorlik choralariga qat’iy rioya qilishga chaqirmoqda. Mutaxassislar seysmik faollik davom etishi mumkinligini bildirgan va hududda yuqori tayyorgarlik holati saqlanmoqda.

Filippindagi ushbu zilzila so‘nggi yillarda qayd etilgan eng kuchlilaridan biri sifatida baholanmoqda.