Sun’iy intellekt yordamida qarzdan qutuldi ayol
Nyu-Yorkda yashovchi tadbirkor ayol Steysi Dennett advokat yollamasdan, sun’iy intellekt yordamida sud jarayonini muvaffaqiyatli yakunladi. Bu haqda Zamin.uz xabar berdi.
U ChatGPT dasturidan foydalanib, qarz majburiyatidan qutuldi va ikki ming dollarlik moliyaviy muammoni hal qildi. Dennett Nyu-Meksiko shtatidan bo‘lib, uy sharoitida fitnes bilan shug‘ullanuvchi kichik biznes egasi hisoblanadi.
Sudga chaqiruv qog‘ozi kelganida advokat xizmatining yuqori narxi uni qiyinchilikka solgan, shuning uchun u ChatGPT’dan yordam so‘radi. Sun’iy intellekt unga himoya nutqini tayyorlashda, dalillarni tartibga solishda va sud uchun zarur hujjatlarni shakllantirishda yordam berdi.
Dennett ChatGPT’dan o‘zini Garvard universiteti professori sifatida tasavvur qilib, hujjatlarni tanqidiy tahlil qilishni so‘ragan. Natijada sud qarori ayol foydasiga chiqdi, qarz miqdori qisqartirildi va masala tinch yo‘l bilan hal qilindi.
Qarshi tomon advokatlari suddan so‘ng unga huquq sohasida faoliyat yuritishni taklif qilishdi. Amerikada bunday holatlar kam uchramaydi.
Masalan, Los-Anjelesda yashovchi Linn Uayt uy ijarasi bo‘yicha sudda ChatGPT va Perplexity vositalaridan foydalanib, 55 ming dollarlik jarima va 18 ming dollarlik qarzdan ozod bo‘ldi. Yana bir amerikalik, Jennifer Allan, “30 kunlik ChatGPT maslahatlari” yordamida 11 ming dollarlik qarzini to‘lashga muvaffaq bo‘ldi.
U sun’iy intellektdan shaxsiy byudjetni rejalashtirish va xarajatlarni kamaytirish bo‘yicha tavsiyalar oldi. Ushbu voqealar sun’iy intellektning huquqiy va moliyaviy sohalarda insonlarga amaliy yordam berish imkoniyatini yana bir bor tasdiqlaydi.
Sun’iy intellekt vositalarining keng qo‘llanilishi kelajakda ko‘plab sohalarda samarali natijalarga erishish imkonini yaratadi.
