Qozog‘iston hukumati sog‘lom turmush tarzini targ‘ib qilish maqsadida spirtli ichimliklar savdosiga yangi cheklovlar joriy etishni rejalashtirmoqda. Bu haqda Zamin.uz xabar berdi.
Ichki ishlar vaziri Yerjan Sadenovning ma’lumot berishicha, yangi qonun loyihasiga ko‘ra, alkogol mahsulotlari faqat maxsus litsenziyaga ega do‘konlarda sotilishi mumkin bo‘ladi. Shuningdek, onlayn savdo to‘liq taqiqlanishi nazarda tutilmoqda.
Vazirlik savdo nuqtalari sonini kamaytirish va litsenziya talablarini kuchaytirish orqali nazoratni yanada mustahkamlashni taklif qilmoqda. Bu chora-tadbirlar ichki bozorda alkogol tarqalishini cheklash va uning ijtimoiy zararlarini kamaytirishga qaratilgan.
Sadenovning ta’kidlashicha, ko‘ngilochar joylarda mast holda jinoyatlar soni sezilarli darajada oshgan. O‘tgan yilda bunday joylarda 1400 dan ortiq huquqbuzarlik, jumladan, uchta qotillik qayd etilgan.
Vazir spirtli ichimliklar savdosining vaqt jihatidan cheklanishi jamoat xavfsizligi va fuqarolarning sog‘ligini himoya qilishda muhim ahamiyatga ega ekanini ta’kidladi. Shuningdek, mamlakatda sog‘lomlashtirish va reabilitatsiya markazlari yetishmasligi jiddiy muammo sifatida qayd etildi.
Hozirda 38 ta markaz faoliyat yuritmoqda va ularda taxminan 700 o‘rin mavjud. Yaqin kelajakda yana 14 ta yangi muassasa tashkil etilishi rejalashtirilgan.
Qozog‘istonda alkogol savdosiga oid cheklovlar so‘nggi yillarda bosqichma-bosqich kuchaytirilmoqda. Masalan, 2014 yildan buyon kuchli spirtli ichimliklarni kechki 21:00 dan ertalab 12:00 gacha, yengil alkogol mahsulotlarini esa 23:00 dan 8:00 gacha sotish taqiqlangan.
Yangi qonun qabul qilingach, spirtli ichimliklar muomalasi yanada qat’iy nazoratga olinib, sog‘lom turmush madaniyatini rivojlantirishga qaratilgan yangi davr boshlanishi kutilmoqda.
