Xiaomi SU7 Ultra avariyada haydovchi halok bo‘ldi
Xitoyning g‘arbiy qismida joylashgan Chendu shahrida Xiaomi SU7 Ultra elektromobili bilan og‘ir avariya sodir bo‘ldi. Bu haqda Zamin.uz xabar berdi.
Ma’lumotlarga ko‘ra, yuqori tezlikda harakatlanayotgan avtomobil Tyanfu shohko‘chasida to‘siqqa urilib, yonib ketgan. Voqea joyida haydovchi mashinani vaqtida tark eta olmagan, chunki avariyadan so‘ng elektron tizim avtomatik ravishda eshiklarni qulflab qo‘ygan.
Natijada haydovchi halok bo‘lgan. Yong‘in xizmati hodisa joyiga tez yetib kelgan, ammo avtomobil butunlay yonib ketgan.
Ushbu avariya ortidan Xiaomi kompaniyasining aksiyalari taxminan 9 foizga qadrsizlandi. Kompaniya hodisa yuzasidan tekshiruv boshlaganini ma’lum qildi.
Ba’zi mutaxassislar avariyaning inson omili sabab bo‘lishi mumkinligini ta’kidlamoqda. Hozirda voqea sabablari va tafsilotlari o‘rganilmoqda.
Ushbu holat xavfsizlik choralarini yanada kuchaytirish zaruratini ko‘rsatmoqda.
