Osiyo taraqqiyot banki O‘zbekistonga 500 mln dollar ajratdi
Osiyo taraqqiyot banki O‘zbekiston iqtisodiyotiga 500 million dollar miqdorida qarz ajratishni ma’qulladi. Bu haqda Zamin.uz xabar berdi.
Ushbu mablag‘ “Iqtisodiy boshqaruvni takomillashtirish dasturi”ning ikkinchi bosqichi doirasida taqdim etiladi. Dastur davlat korxonalarini zamonaviy boshqarish, fiskal shaffoflikni oshirish hamda raqobatbardosh iqtisodiy muhitni yaratishga qaratilgan bo‘lib, amalga oshirilayotgan islohotlarning uzviy davomi hisoblanadi.
OTBning O‘zbekistondagi vakolatxonasi direktori Kanokpan Lao-Araya ta’kidlashicha, bank mamlakatning Jahon savdo tashkilotiga a’zo bo‘lishi va global iqtisodiyotda faol ishtirok etishiga yordam berishga sodiqdir. Dastur doirasida davlat-xususiy sheriklikda yagona tartiblarni joriy etish, raqobat va investitsiyalarni boshqarish bo‘yicha yangi qonunlar qabul qilish, davlat korxonalarini xalqaro standartlar asosida boshqarish, soliq bazasini kengaytirish va xalqaro soliq hamkorligini rivojlantirish, shuningdek korrupsiyaga qarshi kurash va manfaatlar to‘qnashuvini oldini olish bo‘yicha qonunchilikni takomillashtirish rejalashtirilgan.
Bundan tashqari, dastur ijtimoiy himoya tizimini kuchaytirishni ham nazarda tutadi. Bu orqali aholining zaif qatlamlariga islohotlarning ta’sirini yumshatish maqsad qilingan.
Ma’lumot uchun, joriy yilda O‘zbekiston va Osiyo taraqqiyot banki o‘rtasidagi hamkorlik 30 yillik tarixga ega bo‘ldi. 1995-yildan buyon bank mamlakatga jami 14,6 milliard dollar miqdorida yordam ko‘rsatgan.
OTB 30-sentabrda e’lon qilgan hisobotida O‘zbekiston iqtisodiy o‘sish prognozida o‘zgarish yo‘qligini bildirdi. Bankning taxminiga ko‘ra, 2025-yilda iqtisodiy o‘sish 6,6 foizni, 2026-yilda esa 6,7 foizni tashkil etadi.
Bu ko‘rsatkichlar mamlakat iqtisodiyotining barqaror rivojlanishidan dalolat beradi.
