Tramp Ispaniyaga mudofaa xarajatlarini oshirishni talab qildi
AQSH prezidenti Donald Tramp Ispaniyaning mudofaa xarajatlarini oshirishdan bosh tortgani sababli Madridga iqtisodiy bosim o‘tkazishni rejalashtirayotganini ma’lum qildi. Bu haqda Zamin.uz xabar berdi.
Trampning ta’kidlashicha, Ispaniya NATO a’zolari orasida yalpi ichki mahsulotning atigi 5 foizini mudofaa ehtiyojlariga sarflamagan yagona davlatdir. Oq uyda jurnalistlar bilan suhbatda u, Ispaniyadan noroziligini bildirar ekan, mudofaa xarajatlarini 5 foizga yetkazmagan davlatlarga nisbatan import tariflari joriy etilishi mumkinligini aytdi.
Tramp, shuningdek, Madridning bu boradagi sustkashligi Yevropa xavfsizligiga salbiy ta’sir ko‘rsatishi mumkinligini ta’kidladi. Avvalroq u Finlyandiya prezidenti Aleksandr Stubb bilan uchrashuvda ham Ispaniyaning mudofaa xarajatlari bo‘yicha boshqa NATO mamlakatlaridan ancha ortda qolayotganini qayd etgan edi.
Prezident Tramp Ispaniyaga nisbatan qat’iy choralar ko‘rilishi mumkinligini bildirar ekan, ularni NATOdan chiqarish haqidagi fikrni ham ilgari surdi. Uning so‘zlariga ko‘ra, Ispaniyaning majburiyatlarini bajarmasligi uchun hech qanday asos yo‘q.
Ispaniya hukumati esa o‘z navbatida mudofaa xarajatlarini belgilangan darajaga yetkazmagan bo‘lsa-da, qurolli kuchlarning jangovar tayyorgarligini oshirish va NATO bilan kelishilgan tashabbuslarni to‘liq amalga oshirishda davom etayotganini ma’lum qildi. Shuningdek, ular mudofaa sohasidagi majburiyatlarni bajarishga intilayotganini ta’kidlamoqda.
