Bishkekda terakt tahdidi bilan shaxs qo‘lga olindi
Qirg‘iziston poytaxti Bishkekda xavfsizlik xizmatlari tomonidan terakt sodir etish bilan tahdid qilgan shaxs qo‘lga olindi. Bu haqda Zamin.uz xabar berdi.
Bu haqda Qirg‘iziston Milliy xavfsizlik davlat qo‘mitasi 18-oktyabr kuni ma’lum qildi. Ma’lumotlarga ko‘ra, ushbu holat “Bishkek daxshati” nomli Telegram kanali orqali tarqatilgan yolg‘on xabarlar asosida aniqlangan.
Tergov davomida Ukraina fuqarosi Ya. Ovsyuk mazkur kanalni yaratgani va keyinchalik uning nomini “AVERSION” deb o‘zgartirgani aniqlandi.
U kanal orqali shahar maktablari va yirik savdo markazlarida terakt amalga oshirilishi haqida yolg‘on ma’lumotlar tarqatgan. Milliy xavfsizlik qo‘mitasi xabariga ko‘ra, “ayana” nomli foydalanuvchi audioxabar orqali “GUM”, “SUM”, “Bishkek Park”, “Dordoy Plaza”, “Azia Mall” va “Tommi Mall” savdo markazlarini portlatish niyatida ekanligini bildirgan.
Bu yolg‘on tahdidlar aholi orasida vahima va qo‘rquv uyg‘otgan, ayrim jamoat joylarida faoliyat vaqtincha to‘xtatilgan. Qirg‘iziston maxsus xizmatlari tomonidan olib borilgan tezkor choralar natijasida jinoyat ishi doirasida Qirg‘iziston fuqarosi G.A.
hibsga olindi. U terrorchilik harakati bilan tahdid qilish jinoyati bo‘yicha gumonlanuvchi sifatida vaqtinchalik saqlash izolyatoriga joylashtirilgan.
Rasmiy ma’lumotlarga ko‘ra, hozirda hodisaning barcha tafsilotlari bo‘yicha tergov ishlari davom etmoqda. Tergov jarayonida yolg‘on xabarlarni tarqatish sabablari va boshqa shaxslarning ishtiroki ham o‘rganilmoqda.
Milliy xavfsizlik qo‘mitasi jamoatchilikka murojaat qilib, bunday provokatsiyalarga ishonmaslik, tekshirilmagan ma’lumotlarni tarqatmaslik va har qanday shubhali holatlar haqida rasmiy organlarga xabar berishni tavsiya etdi.
