Yaponiyada 14 yil oldingi qiz jasadi topildi
Yaponiyada 2011-yilda yuz bergan zilzila va sunami oqibatida bedarak yo‘qolgan 6 yoshli Natsuse Yamane jasadining qoldiqlari 14 yil o‘tib topilib, oilasiga topshirildi. Bu haqda Zamin.uz xabar berdi.
Bu haqda The Straits Times xabar berdi. Ma’lumotlarga ko‘ra, politsiya 2025-yil 16-oktyabr kuni Miyagi prefekturasining Minami-Sanriku shahrida Natsusening suyak qoldiqlarini uning ota-onasiga rasmiy ravishda topshirgan.
Qizchaning onasi Chiyumi Yamane suyaklar solingan idishni bag‘riga bosib, ko‘z yoshlarini to‘kib, “Uyga qaytganing uchun rahmat, qizim”, degan. Bu so‘zlar oilaning uzoq yillik intizori va og‘riqli kutishidan keyingi yengillik lahzasi bo‘ldi.
Zilzila vaqtida Natsuse buvisi bilan uyda bo‘lgan. To‘satdan kelgan to‘fon ularni suv oqimiga tortib ketgan.
Buvisi omon qolgan, ammo qizaloqdan hech qanday xabar bo‘lmagan. Oilasi bir necha oy davomida uni izlagan va tirik qolgan bo‘lishi mumkin degan umidni yo‘qotmagan.
Ammo yarim yildan so‘ng qizining vafot etganini qabul qilishga majbur bo‘lgan. Shundan keyin har yili iyun oyida, Natsusening tug‘ilgan kunida, oilasi uning sevimli qaymoqli tortlaridan tayyorlab, xotirasini yod etgan.
2023-yil fevral oyida Minami-Sanrikudan taxminan 100 kilometr uzoqlikdagi Ivate prefekturasi qirg‘og‘ida bir kishi sohilni tozalash jarayonida jag suyagi parchasini topgan. Keyinchalik mitoxondrial DNK tahlili orqali bu suyaklarning Natsusega tegishli ekani tasdiqlangan.
Qizchaning onasi Chiyumi Yamane bu holatni oiladagi yo‘qolgan parchaning qayta topilishi deb atagan va vaqt yana harakatlana boshlagandek tuyulganini bildirgan. Yaponiyada ushbu voqea sabr va umid timsoli sifatida qabul qilinmoqda.
14 yil davomida intizorlik bilan qizini kutgan oila nihoyat uning oxirgi manzilini topgani ko‘plab insonlarni chuqur ta’sirlantirdi.
