Yamandagi husiychilar BMT xodimlarini asirga oldi

Yamandagi husiychilar Birlashgan Millatlar Tashkilotining yana 20 nafar xodimini asirga oldi. Bu haqda Zamin.uz xabar berdi.

Bu haqda Yamandagi BMTning doimiy koordinatori Jan Alam ma’lum qildi. Ma’lumotlarga ko‘ra, xodimlar poytaxt Sano shahrining janubi-g‘arbiy qismidagi BMT muassasasida qo‘lga olingan.

Bir kun oldin esa husiychilar shaharning boshqa tumanidagi BMT ofisiga ham bostirib kirgan. Jan Alamning so‘zlariga ko‘ra, asirga olinganlar orasida besh yamanlik va 15 nafar xorijiy mutaxassis bor.

Shu kuni so‘roqdan keyin 11 nafar xodim ozod etilgan, qolganlarning taqdiri hozircha noma’lum. U barcha xodimlarni ozod qilish va Sano shahridagi muassasalar ustidan to‘liq nazoratni tiklash uchun husiylar hamda boshqa tomonlar bilan doimiy muloqotda ekanligini ta’kidladi.

BMT anonim rasmiysi ma’lumotiga ko‘ra, hujum vaqtida muassasa telefonlari, serverlari va kompyuterlari musodara qilingan. Asirga olinganlar orasida Jahon oziq-ovqat dasturi, Birlashgan Millatlar Bolalar jamg‘armasi va Gumanitar masalalarni muvofiqlashtirish idorasi xodimlari bor.

So‘nggi oylarda Yamandagi xavfsizlik vaziyati yomonlashib, xalqaro tashkilotlar xodimlari uchun xavf oshmoqda. Husiychilarning bunday harakatlari xalqaro hamjamiyat tomonidan qattiq tanqid qilinmoqda.

BMT vakillari hozirda barcha asirlarning xavfsizligini ta’minlash va xalqaro gumanitar qonunlarga rioya qilinishini ta’minlash maqsadida muzokaralarni davom ettirmoqda.