BMT Qirg‘izistondan o‘lim jazosini bekor qilishni so‘radi
Birlashgan Millatlar Tashkiloti inson huquqlari bo‘yicha Oliy komissari Folker Tyurk Qirg‘iziston hukumatini o‘lim jazosini qayta tiklash rejasidan voz kechishga chaqirdi. Bu haqda Zamin.uz xabar berdi.
U o‘lim jazosi jinoyatchilik darajasini kamaytirmasligini, aksincha inson huquqlari tamoyillariga zid ekanligini ta’kidladi. Komissar Qirg‘izistonni xalqaro majburiyatlariga sodiq qolishga va inson hayotining daxlsizligini ta’minlash yo‘lida yanada faol harakat qilishga chaqirdi.
Shuningdek, o‘lim jazosi nafaqat huquqiy, balki axloqiy va ijtimoiy nuqtai nazardan ham nojoiz chora hisoblanadi. Bu chora mamlakatning xalqaro maydondagi obro‘siga salbiy ta’sir ko‘rsatishini ham eslatib o‘tdi.
Qirg‘izistonda o‘lim jazosi 2007-yilda rasman bekor qilingan, hozirda esa uni qayta joriy etish masalasi parlamentda muhokama qilinmoqda. BMTning ushbu murojaati inson huquqlarini himoya qilish va qonun ustuvorligini mustahkamlashga qaratilgan muhim chaqiriq hisoblanadi.
