Germaniya Federal statistika idorasi ma’lumotlariga ko‘ra, 2024-yil yakunlariga kelib mamlakatda mehnat faoliyati bilan band aholining chorak qismidan ortig‘ini muhojirlar va ularning avlodlari tashkil etgan. Bu haqda Zamin.uz xabar berdi.
Rasmiy hisob-kitoblarga ko‘ra, bu ko‘rsatkich umumiy ishchi kuchining 26 foiziga tengdir. Ayrim sohalarda esa muhojirlarning ulushi deyarli yarimga yetgan.
Tahlillarga ko‘ra, muhojirlar Germaniya iqtisodiyotining eng mehnattalab tarmoqlarida muhim o‘rin egallaydi. Masalan, payvandlash ishlarida ularning ulushi 60 foizni tashkil etadi.
Oziq-ovqat ishlab chiqarish va oshpazlik sohasida bu ko‘rsatkich 54 foizga teng. Qurilish uskunalarini o‘rnatishda 48 foiz, jamoat transporti haydovchilari orasida 47 foiz, go‘shtni qayta ishlashda 46 foiz, ovqatlanish muassasalarida xizmat ko‘rsatishda esa 45 foizni tashkil qiladi.
Boshqa yirik ishlab chiqarish sohalarida ham muhojirlarning hissasi katta. Plastmassa va rezina mahsulotlari ishlab chiqarishda ular 44 foiz, mehmonxona va turizm sohasida 40 foiz, yuk tashishda 39 foiz, metall ishlab chiqarish va qayta ishlashda 37 foiz, qariyalarga qarash xizmatlarida esa 33 foiz ulushga ega.
Davlat idoralari va huquqni muhofaza qilish tizimida esa muhojirlar soni ancha kam. Masalan, politsiya tizimida ularning ulushi atigi 7 foizni tashkil etadi.
Tez yordam va qutqaruv xizmati xodimlari orasida esa 8 foizga teng. Soliq inspeksiyasi, davlat va sug‘urta muassasalari, boshlang‘ich maktab o‘qituvchilari hamda yuristlar kabi kasblarda muhojirlarning ulushi 9-10 foiz atrofida.
Ma’lumotlar 2024-yilda mamlakat bo‘ylab o‘tkazilgan keng qamrovli mikroso‘rovnoma asosida yig‘ilgan. So‘rovda 15 yoshdan katta aholining taxminan bir foizi ishtirok etgan.
Biroq natijalarda yotoqxona va ijtimoiy turar joylarda yashovchi shaxslar hisobga olinmagani sababli, ko‘plab qochqinlar va vaqtinchalik muhojirlar statistikadan tashqarida qolgan. Mutaxassislar ta’kidlashicha, Germaniya iqtisodiyotida muhojirlar ulushining yuqori bo‘lishi mamlakat mehnat bozoridagi talab va taklif muvozanatini saqlashda muhim ahamiyatga ega.
Ayniqsa, sanoat, logistika va xizmat ko‘rsatish sohalarida ularning hissasi Germaniyaning barqaror iqtisodiy o‘sishiga xizmat qilmoqda. Shu bilan birga, tahlilchilar davlat xizmatlari tizimida muhojirlarning faolligini oshirish, ularga maxsus ta’lim va malaka oshirish dasturlarini joriy etish zarurligini ta’kidlamoqda.
Bu esa mehnat bozorini yanada diversifikatsiya qilish va ijtimoiy integratsiyani kuchaytirishga yordam beradi.
